Pavlodarda revmotologııalyq ortalyq ashyldy

<p>PAVLODAR. KAZINFORM - Óńirdegi revmotologııa qyzmeti buǵan deıin óz aldyna jeke mekeme bolmaǵan. Jańa ortalyqta 2 statsıonar jumys isteıdi.&nbsp;</p>

Emdeý mekemesi oblystyq Sultanov atyndaǵy aýrýhana ishinen ashyldy. Ortalyq dırektory Arman Musabekovtiń aıtýynsha, budan bylaı revmotologııalyq aýrýǵa ushyraǵan jandar bilikti mamandardan medıtsınalyq kómek alady. Bul úshin barlyq múmkindik jasalǵan, jaqsy jabdyqtalǵan zerthana da iske qosyldy.

- Statsıonarlyq kómekten bólek, emhana janyndaǵy ambýlatorııalyq qyzmetti keńeıtip, kúndizgi statsıonardy ashý oıda tur. Ol jerde patsıentter medıtsınalyq tekserýden ótip, mamandardyń keńesin alady jáne em-shara kórsetiledi, - deıdi A.Musabekov.

Aıtyp ótý kerek, mundaı revmotologııalyq jeke mekeme oblysta alǵashqy ret ashylyp otyr. Buǵan deıin atalǵan aýrý túrlerin emdeý úshin aýrýhanalardyń terapııalyq jáne kardıologııalyq bólimshelerinde birneshe tósekten ǵana qoıylyp kelgen.

QR Densaýlyq saqtaý mınıstrliginiń bas revmotology, medıtsına ǵylymdarynyń doktory, professor Ǵalymjan Toǵyzbaev ortalyq arqyly turǵyndarǵa sapaly em-dom jasalatynyn, erte anyqtalǵan aýrýlardyń nátıjesinde adamdardy múgedektikten saqtap qalýǵa bolatynyn jetkizdi. Onyń sózinshe, aldaǵy ýaqytta mundaı mekemeler elimizdiń ózge óńirlerinde ashylady dep josparlanǵan.

Qazir mekemeniń ózinde tórt, al emhanada eki dáriger naýqastardy qabyldap jatyr.