Pavlodarda psıhonevrologııalyq ortalyqta balalardy qınaý boıynsha 18 qylmystyq is qozǵaldy
«Ortalyqty tekserý barysynda sanıtarlyq erejelerdiń saqtalmaýy, konstıtýtsııalyq quqyqtardyń buzylýy syndy kemshiliktermen qatar balalardy túski uıqy kezinde jáne túnde kereýetke baılaý boıynsha buzýshylyqtardy anyqtadyq. Olardyń kópshiligin uryp-soqqan jáne uıqydan keıin olardy sheship alýdy umytqan jaǵdaılar da bolǵan. Atalǵan faktiler boıynsha oblystyq prokýratýra 18 qylmystyq is qozǵady», - dedi Pavlodar oblystyq prokýratýrasy Qoǵamdyq múddelerdi qorǵaý basqarmasynyń basshysy Ashat Qoqymbaev.
Onyń aıtýynsha, prokýratýra ortalyq uıymynyń serverine jazylǵan vıdeofaıldardy kórgen soń, zańbuzýshylyqtardy áshkerelegen. Qańtar aıynda da qadaǵalaýshy organ kámelettik jasqa tolmaǵandardyń quqyqtaryn qorǵaý máselesin teksergen jáne bul tizimge psıhonevrologııalyq ortalyq ta engen.
«Qazirgi ýaqytta tórt qylmystyq is boıynsha 110-baptyń ekinshi bóligine sáıkes úkim shyǵaryldy. Bir is sot qaralymynda jatyr. Qalǵan 13 qylmystyq is boıynsha sotqa deıingi tergeý amaldary júrip jatyr», - dedi A. Qoqymbaev.
Qylmystyq is qozǵaýdan bólek, prokýratýra Pavlodar oblysynyń ákimdigine tabylǵan buzýshylyqtardy joıý, balalardy qolaıly ǵımaratqa ornalastyrý jóninde usynym jiberdi.
«Balalar jatqan qazirgi ǵımarat arnaıy mamandandyrylmaǵan. Onyń ornalasqan jeriniń ózi birneshe zańdy buzyp otyr. Internattyq tıptegi, emdeý-saýyqtyrý ǵımarattary qalanyń ónerkásiptik aımaǵynda turmaýy tıis. Olar qalanyń iskerlik bóliginde salynýy kerek. Al qazirgi ǵımarat ónerkásiptik kásiporyndarmen, qoımalarmen jáne túzetý mekemelerimen kórshiles ornalasqan. Tipti qorshaýdyń arǵy betinde janar-jaǵarmaı qoımasy bar», - dedi Ashat Qoqymbaev.