Pavlodarda polıgondarǵa qoqysty tegin qabyldaý usynyldy

<p>PAVLODAR. KAZINFORM &ndash; Pavlodar oblysynda zańsyz úıilgen kúl-qoqys oryndary kóbeıip ketken. Búginde mundaı oryndardyń sany 30-dan asady. Depýtattar men qoǵam belsendileri máseleni sheshýdiń joly &ndash; qoqysty tegin qabyldaý dep otyr.</p>

Zańsyz kúl-qoqys ornynyń biri Pavlodar qalasyndaǵy Soltústik ónerkásip aýdanynda ornalasqan. Munda áldebireýler qurylys jumystarynan qalǵan qaldyqtardy zańsyz úıgen. Al, dál janynda qum alynatyn shuńqyr qazylyp, ony qaladaǵy kásipkerler paıdalana bastaǵan. Qum alynatyn oryn da zańsyz paıdalanylyp otyr.

Óńirlik ekologııa departamenti basshysynyń orynbasary Maǵzum Qoqymbaevtyń dereginshe, arnaıy reıdterdiń jáne «Ǵarysh sapary» ulttyq kompanııasynyń ǵaryshtan túsirgen fotosýretteriniń nátıjesinde zańsyz kúl-qoqys oryndary ýaqyt saıyn anyqtalady. 

Foto: pavon.kz

«Málimetterdi jergilikti atqarýshy organdarǵa beremiz. Olar jyl saıyn ruqsat etilmegen kúl-qoqys tógý oryndaryn joıýmen aınalysady. Jyl basynan jeti ákimdikke jalpy somasy 1,3 mln teńge aıyppul saldyq. Al Pavlodar qalasynyń ózinde búginde 10 zańsyz kúl-qoqys orny bar. Qoqys shyǵaratyn kólikterdiń júrgizýshileri qarajattaryn únemdeý maqsatynda tıep alǵan turmystyq jáne qurylys qaldyqtaryn jurt kózinen tasa osyndaı jerlerge tógip ketedi. Negizi mundaı qaldyqtar qoqysty aqyly túrde qabyldaıtyn polıgondarǵa aparylýy kerek. Zańsyz úıilgen oryndarǵa qoqysty syrttan kelip eshkim tógip ketpeıdi, ony jasap otyrǵan qala turǵyndary», - deıdi M.Qoqymbaev.

Foto: pavon.kz

Qalalyq máslıhat depýtaty Bolat Súleımenovtiń aıtýynsha, aıyna eki ret qoǵam belsendileri men polıtsııa qyzmetkerlerin torýylǵa shyǵaryp, kezekshi patrýlderdi jaı mashınalarǵa otyrǵyzyp qoıýǵa bolady. Al zań buzýshylardy beınejazbaǵa túsirip, kópshilikke kórsetken abzal. 

«Ókinishke qaraı, biz kóbine bıýdjet qarajatyn osyndaı zańsyz kúl-qoqys oryndaryn joıýǵa ysyrap etemiz. Meniń oıymsha, bul qarajatty kúl-qoqys qabyldaıtyn oryndardy sýbsıdııalaýǵa jumsaýymyz kerek. Esesine olar qoqysty tegin qabyldasyn. Qoǵam kóbine máseleniń saldarymen kúresýge úırenip qalǵan. Qoqysty aqyly qabyldaý júrgizýshilerdi osyǵan ıtermelep otyrǵany anyq. Al aınalyp kelgende zańsyz tógilgen qaldyqtardy biz báribir qazyna qarajaty esebinen joıamyz. Sondyqtan, polıgondar qoqysty tegin qabyldaıtyndaı júıe qajet. Qarajatty soǵan bóleıik», - degen usynysyn jetkizdi depýtat.

Eske sala keteıik, Astanada ruqsat etilmegen 33 qoqys orny joıyldy.