Pavlodarda polıtseı jolaı ótken adamdardy qapqan alabaıǵa oq atýǵa májbúr boldy
«21 tamyz kúni saǵat 06:31-de «102» nómirine Bekhojın kóshesindegi Saýda úıleriniń biriniń artynda belgisiz ıt er adamdy tistep alǵany jáne ótip bara jatqan adamdarǵa qaraı shapqany týraly qońyraý kelip tústi», – dep habarlady Pavlodar oblysy polıtsııa departamentiniń baspasóz qyzmeti.
Tártip saqshylarynyń habarlaýynsha, oqıǵa ornyna Pavlodar qalalyq PB patrýldik polıtsııa batalonynyń AP-627 avtopatrýli jiberildi.
Kelgen boıda polıtseıler ótip bara jatqan adamdarǵa júgirip, ózin agressıvti ustaǵan alabaı tuqymdy ıtti kórdi.
Sondaı-aq er adam bul ıttiń áıelge shabýyl jasaǵanyn, keıin ony tistep alǵanyn aıtyp, polıtsııaǵa júgindi.
Jaǵdaıdy baǵalap, azamattardyń densaýlyǵyn saqtaý maqsatynda polıtsııa kishi leıtenanty Ersin Shahmanov PM-9 mm qyzmettik qarýyn qoldanyp, eki ret oq atty.
It tiri, veterınarlyq qyzmetke tapsyryldy. Onyń ıesi izdestirilip jatyr.
Jábirlenýshi, 33 jastaǵy er adam – polıtsııa depatamentiniń qyzmetkeri – jedel járdem kóligimen aýrýhanaǵa jetkizildi.
Oǵan «oń jaq bileginiń ekinshi sanatty tisteý jaraqaty» dıagnozy qoıyldy.
Jábirlenýshiniń aıtýynsha, ol tańǵy ýaqytta jumysqa shyqqan. Ótip bara jatyp, belgisiz ıttiń áıelge shabýyl jasaǵanyn kóredi.
Oılanbastan júgirip kelip, áıeldi jaýyp, ıtten qutqarady. It oǵan da atylǵan. Polıtsııany kýágerler shaqyrǵan.
Polıtsııa qyzmetkeriniń qyzmettik qarý qoldaný faktisi boıynsha tergeý amaldary júrip jatyr.
Foto: polisia.kz