Pavlodarda pırotehnıka ónimderin zańsyz saýdalap júrgender aıyppul arqalap jatyr
Jańa jyl merekesi jaqyndaǵan tusta jer-jerlerde pırotehnıkalyq ónimderdiń zańsyz saýdasy beleń alatyny jasyryn emes. Turǵyndardyń qaýipsizdigin nysanaǵa alǵan pavlodarlyq polıtseıler zańsyz derekterdiń aldyn alý maqsatynda profılaktıkalyq is-sharalarly bastap ketti. Olar dúkender, saýda úıleri men pırotehnıkalyq ónimderdi satýǵa bolatyn oryndar boıynsha reıdter júrgizip, ruqsat berý qujattaryn tekserýde. Kásipkerler men satýshylarǵa ónimdi kámeletke tolmaǵandarǵa satýǵa tyıym salynatynyn jáne jarylys qaýpi bar buıymdardy zańsyz ótkizgeni úshin jaýapkershilik baryn eskertip keledi.
- Tártip saqshylary áleýmettik jelilerge monıtorıng júrgizedi. Onda keıbir azamattar pırotehnıkalyq ónimderdi onlaın satatyny anyqtaldy. Pavlodarda Baıjanov kóshesinde ruqsat qujattarysyz pırotehnıkalyq buıymdardy satý deregi anyqtaldy. Satýshydan 45 jaǵý zaty bar 4 qorap tárkilendi. Taýarlardy zańsyz satqany úshin satýshy qyzmetker jaýapqa tartylyp, 25 aılyq eseptik kórsetkish mólsherinde aıyppul salyndy,-dep habarlady Pavlodar oblysy polıtsııa departamentiniń baspasóz qyzmetinen.
Polıtseıler ot-shashýlardy satyp alý kezinde satýshydan ónim sertıfıkatyn talap etý kerektigin eskertedi. Pırotehnıkalyq ónimderdiń syrtynda nemese qorabynda paıdalaný nusqaýlyǵy mindetti túrde bolýy kerek. Eger ónimniń jaramdylyq merzimi ótip ketse, ony paıdalanbaǵan abzal.
Mamandar pırotehnıkalyq buıymdardy qaltada alyp júrýge, bólshekteýge, úıkeleýge jáne ystyq jerde keptirýge keptirýge bolmaıtynyn aıtady. Ata-analar ot-shashýdy balalarynyń baqylaýsyz paıdalanýyna tyıym salýy qajet.
Eske sala keteıik, Pavlodardyń ortalyq alańynda qulap qalǵan shyrsha bıyl qaıtadan qurylady.