Pavlodarda óz qurdasyn aıaýsyz tepkilegen jasóspirimderdiń isi sotqa jiberildi

<p>Byltyr Pavlodar qalasynda jas shamalary 12-17 jastaǵy bir top bala óz qatarlasyn aıaýsyz uryp-soqqany jergilikti qoǵamnyń ashý-yzasyn týdyrǵan. Polıtsııa kámeletke tolmaǵandardyń isin uzaq tergep, sotqa joldady, dep habarlaıdy Kazinform.</p>

Oqıǵa 24 shilde kúni Toraıǵyrov ýnıversıtetine qarasty stadıon mańaıynda bolǵan edi.

Jasóspirimniń bas súıegine, denesine jaraqat salyp, oılaryna kelgen jaýyzdyqty júzege asyrǵandardyń barlyǵy - kámelet jasyna tolmaǵandar. Jabyla sabaǵany bylaı tursyn, zardap shegýshini tyr jalańash etip sheshindirip, qorlap, onysyn uıaly telefon kamerasyna túsirip alǵan.

Eń sońy beıbastaq qylyq jasaǵandar baladan 100 myń teńge talap etip, bopsalaǵan. Baıǵus balany sońynan dostary taýyp alyp, jedel járdem kóligin shaqyrtqan.

- Atalǵan qylmystyń barlyq mán-jaılary anyqtaldy. Qajetti tergeý is-sharalary aıaqtalyp, onyń nátıjeleri boıynsha materıaldar kámeletke tolmaǵandardyń isteri jónindegi sotqa berildi, - dep habarlady Pavlodar oblysy polıtsııa departamenti bastyǵynyń orynbasary Rashad Óteýov.

Qazirgi ýaqytta tıisti organdarǵa qylmystyq quqyq buzýshylyq jasaýǵa yqpal etken sebepter men jaǵdaılardy joıý týraly usynys engizildi.

Al balany qorlaǵan jasóspirimderdiń ata-analary da tıisinshe jaza arqalady.