Pavlodarda órt sóndirýshiler janyp jatqan turǵyn úıden qyz balany qutqardy

<p>PAVLODAR. KAZINFORM - Órt kópqabatty úıdiń 7-qabatyndaǵy páterdiń balkonynda tutanǵan. Qutqarýshylar bir podezde turatyn 13 adamdy syrtqa alyp aman-esen alyp shyqty.</p>

Óńirlik tótenshe jaǵdaı departamentine habarlaǵandaı, 31 qańtar kúni saǵat 17.30-da Toraıǵyrov kóshesindegi páterdiń balkony janyp jatqany týraly habarlama túsken. Órt sóndirý qyzmetkerleri álgi jerde úı zattary, jıhaz, qaǵazdar jáne elektr plıtasy janyp jatqanyn anyqtady. Jalyn jalpy aýmaǵy 12 sharshy metrdi sharpyp, joǵary temperatýranyń áserinen balkonnyń plastıkalyq tóbesi, tereze jaqtaýy jáne balkon esigi balqyp ketken.

Qutqarýshylar baspaldaqpen 13 adamdy evakýatsııalady, olardyń tórteýi - bala.

Turǵyn úıdiń 8-qabatyndaǵy balkonnan 2013 jylǵy qyz bala qutqarýshylardy kómekke shaqyrǵan. Gaz-tútinnen qorǵaý qyzmetiniń qyzmetkerleri «Fenıst» qutqarý qurylǵysyn (kapıýshonyn) paıdalanyp, qyzdy aman-esen alyp shyqty. Ol úıde jalǵyz bolǵan. Apattar medıtsınasy ortalyǵynyń qyzmetkerleri jasóspirimniń densaýlyǵy din aman ekenin habarlady.

Órt tolyǵymen saǵat 17:54-te joıyldy. Sóndirý jumystaryna barlyǵy 10 tehnıka men 35 qyzmetker jumyldyrylǵan.

Qazirgi kúni oqıǵanyń sebep-saldary anyqtalýda.