Pavlodarda órt qaýipsizdigin saqtamaý saldarynan bes adam qaza bolǵan

<p>PAVLODAR. KAZINFORM - Pavlodarda jylý maýsymy bastalǵaly 5 adam qaıtys bolǵan. Tótenshe jaǵdaılar qyzmetkerleri adamdardyń ólimine kóbine órt qaýipsizdigin saqtamaý sebep bolatynyn aıtady.</p>

Bıyl kúzde Pavlodar oblysynda órt qaýipsizdigin durys saqtamaý saldarynan bes birdeı adam kóz jumdy. Órt sóndirýshiler marqumdardyń ekeýin janyp ketken úıdiń ishinen tapsa, taǵy úsheýi peshten bólingen ýly gazǵa tunshyǵyp ólgen.

- Óńirge qatty aıazdar áli jete qoıǵan joq. Soǵan qaramastan adamdar peshti durys paıdalanbaýdyń qurbanyna aınalyp jatyr. Aqtoǵaı aýdanynyń Mútkenov jáne Sharbaqty aýdanynyń Malınovka aýyldarynda úıden shyqqan órtten eki adam qaıtys boldy. Al Pavlodar aýdanynyń Chernoıarka jáne Zarıa eldi mekenderinde ıis tıgen úsh adam qaza boldy. Úılerinde pesh jaǵatyn turǵyndardyń keıbiri qaýipsizdik talaptaryn eskermeıdi. Ókinishke qaraı, onyń sońy qaıǵyly jaǵdaılarǵa aparyp soqtyrýy múmkin, - deıdi Pavlodar oblysy tótenshe jaǵdaılar departamenti bastyǵynyń orynbasary Qaırat Shaımardenov.

Qoldanystaǵy zańnama boıynsha tótenshe jaǵdaılar qyzmetkerleri jer úıler sektoryna tekserý júrgizýge, uıǵarymdar berýge quqyly emes. Tek profılaktıkalyq jumystar ǵana júrgize alady. Sondyqtan qaýipsizdik talaptary úı ıeleriniń óz jaýapkershilikterinde qala bermek.

Eske sala keteıik, Pavlodarda 34 jasar áıel ıis tıip kóz jumdy.