Pavlodarda oralmandar máselesi qaraldy
Qoǵamdyq qabyldaýǵa kelgenderdiń biri - Ózbekstannan kóship kelgen Dınara Saıfýddınova. - Biz Pavlodar oblysyna 2015 jyly qonystanyp, byltyr Qazaqstannyń azamattyǵyn alǵan edik. Endi Ózbekstannyń azamattyq pasportyn sol eldiń Qazaqstandaǵy elshiligine osy bir aıdyń ishinde tapsyrý kerek eken. Biraq, men tuńǵysh balama bosanýǵa kúnim taıap otyrǵandyqtan, Almatyǵa barýǵa jaǵdaıym joq. Al, tólqujatty keshiktirip aparatyn bolsaq, ákimshilik jaýapkershilikke tartylyp, aıyppul arqalap qalmaımyz ba?, - degen saýalyn joldady Dınara. Oblystyq ishki ister departamenti kóshi-qon polıtsııasy basqarmasynyń aǵa ınspektory Gúlstan Battalovanyń sózinshe, Ózbekstandaǵy ózgeristerge baılanysty tólqujatty mindetti túrde azamat ózi aparyp tapsyrý kerek. - Buryn biz kóship kelgen aǵaıyndardyń barlyǵynyń tólqujatyn jınap alyp, poshtamen jiberetin edik. Keıin Ózbekstandaǵy kóshi-qonǵa baılanysty zań ózgergendikten muny qabyldaýdan bas tartty. Endi elshiliktiń arnaıy portalyna tirkelip qoıyp, jeńildegennen keıin óziń baryp tapsyrýdan basqa amalyń joq. Az ýaqytqa keshikkeniń úshin aıyppul salý múmkin emes, - deıdi Gúlstan Battalova.
Bılik ókilderine nazyn arqalap kelgen aǵaıyndardyń biri - Kúlzathan Janaı. Mońǵolııadan 2012 jyly kóship kelip, memleket tarapynan beriletin kóterme járdemaqysyn ala almaı júr. - Biz 2012 jyldyń qyrkúıek aıynda keldik. Al, jeltoqsannan beri kelgenderdiń barlyǵy alyp jatyr. Sol úshin áli kúnge deıin azamattyq almaı, yqtııarhatpen júrmiz, - deıdi ol. Oblystyq jumyspen qamtýdy úılestirý jáne áleýmettik baǵdarlamalar basqarmasy kóshi-qon bóliminiń bas mamany Muhıt Jaqsylyqulynyń sózinshe, bul zańdaǵy ózgeristerge baılanysty týyndaǵan másele eken. Mysaly, 2012 jyldyń qyrkúıegine deıin kelgenderge oralman mártebesi bir jylǵa berilse, odan keıin kóship kelgen aǵaıyndarǵa oralman kýáligi bes jylmen berilipti. Al, bir jylmen alǵandardyń ýaqyty áldeqashan bitken. Sondyqtan, oralman mártebesi soǵan sáıkes berilip jatqanyn aıtady bas maman.