Pavlodarda onlaın rejımde túrki jazbalary kúnine arnalǵan kontserttik baǵdarlama ótti
- Sharanyń basty maqsaty – ulttar tatýlyǵyn nyǵaıtý men túrki tiliniń abyroıyn asqaqtatý. Qazaqstan – kóp ultty baýyryna basqan kıeli meken. Solardyń ishinde ózge etnos ókilderimen qatar dini men tili bir túrki tildes ulttar da bir atanyń balasyndaı tatý-tátti ómir súrýde. Olarmen eń birinshi qazaq halqyn tyǵyz baılanystyratyn dúnıe Kóne túrki jazba eskertkishteri bolyp tabylady, - deıdi oblys mádenıet, tilderdi damytý jáne arhıv isi basqarmasynyń bas mamany Dáýlet Temirbolat.
Eleýli kúnge arnalǵan shara Túrki jazýlarynyń tarıhy týraly derekti fılmimen bastalyp, kontserttik baǵdarlamamen jalǵasty.
Sondaı-aq, shara barysynda oblys mádenıet, tilderdi damytý jáne arhıv isi basqarmasy basshysynyń mindetin atqarýshy Sáýle Osmanova óńirdiń rýhanı-mádenı ómirin jandandyrýda jáne til saıasatyn júzege asyrýda erekshe belsendilik tanytqan azamattardy marapattap, Alǵys hattar men baǵaly syılyqtardy tabys etti.
Til salasyn damytýǵa qosqan úlesi úshin Til saıasaty komıteti tóraǵasynyń «Qurmet gramotasymen» Qazyna Qadas, Asel Talıpova, Jibek Jolshybekova, Orazbek Bahathan, Aıbek Oralhan, Botagóz Qajtaeva jáne QR Mádenıet jáne sport mınıstrliginiń «Qurmet gramotasymen» Samal Begalınova, Ádilbek Ámirenov, Batyrbek Qaıyr, Erjan Tókenov marapattaldy.
- Mektep qabyrǵasynda bilim alyp júrgen kezimnen memlekettik tildi damytýǵa arnalǵan sharalarǵa qatysyp, baıqaýlarǵa, tilderdi damytý basqarmasy uıymdastyrǵan sharalarda belsendilik tanytyp júrdim. Sońǵy ýaqyttarda qazirgi mádenıet basqarmasynyń quramyna engen tilder bóliminiń baǵyttaýymen respýblıkalyq kórkemsóz jáne jyr, terme baıqaýlaryna qatystym. Báıgeden qur qol qaıtqan emespin, - deıdi Orazbek Bahathan.