Pavlodarda oqýshylary tońyp otyrǵan aýyl mektebine kómir ýaqtyly jetkizilmegen

PAVLODAR. QazAqparat - Pavlodar oblysy Áýelbek aýyldyq mektebinde temperatýralyq rejım qalpyna keltiriledi. Bul jóninde oblys ákiminiń baspasóz qyzmeti málim etti, dep habarlaıdy QazAqparat.

Áleýmettik jelilerde paıda bolǵan oqý ornynyń nashar jylýy týraly shaǵymdardan keıin Pavlodar oblysynyń ákimi Ábilqaıyr Sqaqov Aqtoǵaı aýdanyndaǵy mektepke bardy.

Búginde munda 40 tonna kómir qabyldanyp, temperatýralyq rejımdi qalpyna keltirýge kiristi.

Óńir basshysy oqý ornynyń birneshe kabınetteri men sport zalyn aralap shyqty.

Aqpannyń 21-i kúni tańerteń mektep aýmaǵynda aýa temperatýrasy 15 gradýsty qurady.

Bilim oshaǵynyń ákimshiligi sol kúni mektep ishindegi temperatýralyq rejımdi ońtaıly deńgeıge jetkizemiz dep sendirdi.

- Ótken aptanyń basynan beri kómir jetkizýshimen kelissóz júrgizip jatyrmyz, - dedi Aqtoǵaı aýdanynyń ákimi Qarshyǵa Arynov. – Ol qatty otyndy juma kúni jetkizemiz dep ýáde bergen, biraq ótinishti oryndamady. Bizge bólmelerdi qolda bar kómir qaldyqtarymen jylytýǵa týra keldi.

Belgili bolǵandaı, kómir jetkizýshimen bir aıdan astam ýaqyt boıy sot protsesi júrip jatyr.

Bul rette oblys deńgeıinde bilim oshaǵynyń salqyn bolý qaýpi bar ekeni eshkimge eskertilmegen.

- Bul mektepte qalyptasqan jaǵdaı bıýrokratııa men nemquraıdylyqtyń úlgisi bolyp tabylady, - dedi Pavlodar oblysynyń ákimi. - Kómir jetkizýshimen sottasyp jatqanda, balalar tońyp júr. Bul rette jergilikti atqarýshy organdardyń eshqaısysy bul máseleni bilim basqarmasyna da, oblys ákimdigine de habarlamaǵan. Nege bári únsiz otyrǵan? Kómir óndiretin aımaqta turyp, kómirmen qamtamasyz etý máselesin tezirek sheship, balalardy nazardan tys qaldyrmas edik qoı.

Ábilqaıyr Sqaqov Aqtoǵaı aýdanynyń basshysy Qarshyǵa Arynovqa jáne bilim basqarmasynyń basshysy Dinıslam Bolathanulyna qatań sógis jarııalady.

Sonymen qatar, bilim oshaǵyndaǵy bolǵan jaǵdaıǵa baılanysty basqa da kináli laýazymdy tulǵalarǵa da sheshim qabyldaýdy tapsyrdy.