Pavlodarda múgedekterge arzanqol gadjet satyp ápermek bolǵan basqarma ókili 9 jylǵa sottaldy

<p>PAVLODAR. KAZINFORM - Jumyspen qamtýdy úılestirý jáne áleýmettik baǵdarlamalar basshysynyń orynbasary múmkindigi shekteýli jandarǵa arzanqol noýtbýkter men telefondar satyp alyp, ústinen mol paıda kórmekshi bolǵan. Osylaısha memleket bıýdjetine shamamen 133 mln teńge shyǵyn kelgen.</p>

Qarjylyq monıtorıng agenttigi «Qamqor» jedel aldyn alý sharasy aıasynda múmkindigi shekteýli jandarǵa jetkizilgen ónimderdiń qunyn negizsiz asyra baǵalaý faktilerin anyqtady.

— Pavlodar oblysynyń jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary jáne «Art-Class» JShS atqarýshy dırektoryna qatysty bıýdjet qarajatyn urlaý deregi boıynsha sotqa deıingi tergeý júrgizildi. Belgili bolǵandaı, basqarma «Art-Class» JShS-men jáne «Aıým ı D» MQB-men zaǵıp jáne sańyraý adamdarǵa arnalǵan baǵdarlamalyq júıemen qamtylǵan noýtbýkter, uıaly telefondar satyp alý jóninde shartqa otyrǵan. Onda kórsetilgen taýarlardyń jalpy quny 476 mln teńgeden asqan. Alaıda jetkizýshiniń gadjetteri tıisti tehnıkalyq sıpattamalarǵa sáıkes kelmedi. Sáıkessizdik somasy shamamen 133 mln teńgeni qurap otyr, -dep habarlady Qarjylyq monıtorıng agenttiginen.

Sot Pavlodar oblysy jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasaryn kináli dep tanyp, 9 jylǵa bas bostandyǵynan aıyrdy.

Kásipkerlik qyzmet arqyly 25 mln teńgeden astam zańsyz paıda kórgen jetkizýshi de jazasyz qalǵan joq.

Sot oǵan 7,5 jyl bas bostandyǵynan aıyrý jazasyn taǵaıyndady.

Tehnıkany jetkizýshiden memleket paıdasyna 133 mln teńgege jýyq somasynda azamattyq talap tolyǵymen qanaǵattandyryldy.