Pavlodarda medıtsına mekemelerine 17,9 mln teńge aıyppul salyndy

NUR-SULTAN. QazAqparat – Pavlodar oblysynda tekserilmegen qurylǵylardy qoldanǵan 14 medıtsına mekemesine 17,9 mln teńge aıyppul salyndy. Bul týraly Saýda jáne ıntegratsııa mınıstrliginiń baspasóz qyzmetinen málim etti, dep habarlaıdy QazAqparat tilshisi.

Saýda jáne ıntegratsııa mınıstrligine qarasty Tehnıkalyq retteý jáne metrologııa komıtetiniń Pavlodar oblystyq departamenti 14 densaýlyq saqtaý uıymynyń qyzmetin teksergen. Nátıjesinde barlyq medıtsınalyq mekemelerde tekserýden ótpegen ólsheý quraldary paıdalanylǵany anyqtaldy.

Quzyrly organ dereginshe, atalǵan uıymdarda paıdalaný merzimi ótip ketken júrek dertterin anyqtaýǵa múmkindik beretin elektrokardıograf, tamyr soǵysy men qan quramyndaǵy ottegi mólsherin baqylaıtyn pýlsoksımetrler qoldanysta bolǵan. Sonymen qatar, tekserilmeı paıdalanýǵa berilgen aýyr jaǵdaıdaǵy naýqastyń densaýlyǵy týraly málimetter kórsetiletin monıtorlar, ÝDZ apparattary men tonometrler anyqtalǵan.

«Departament oblystyń qalalary men aýdandary prokýratýralarynyń usynymdary negizinde medıtsına mekemelerin ákimshilik jaýapqa tartty. Nátıjesinde salynǵan ákimshilik aıyppuldardyń jalpy somasy 17 903 235 teńgeni qurady. Qazirgi ýaqytta ákimshilik aıyppuldar tolyq kólemde tólendi», - dep málim etti vedomstvonyń baspasóz qyzmetinen.

Eske salaıyq, buǵan deıin Jezqazǵanda tekserilmegen medıtsınalyq qurylǵylardy paıdalanýǵa jol bergen aýrýhana dırektoryna aıyppul salynǵanyn jazyp edik.