Pavlodarda qystyń kózi qyraýda kópqabatty úıler durys jylymaı otyr

PAVLODAR. QazAqparat - «Pavlodarenergo» AQ kóppáterli úılerde jylýdyń jetkiliksiz bolýynyń aldyn ala sebebin atady, dep habarlaıdy QazAqparat.

Jylýmen jabdyqtaý jónindegi komıssııa jumysynyń aralyq nátıjesi týraly óńir basshysyna Pavlodar ákimi Erjan Imanslıam jáne «Pavlodarenergo» AQ basshysy Oleg Perfılov baıandady.

Pavlodarda turǵyndar jylýdyń jetkiliksizdigine shaǵym túsirgen kóppáterli úılerdi tekseretin komıssııa óz jumysyn jalǵastyryp jatyr.

5 qańtar kúni tańerteń ákimdik pen «Pavlodar jylý jelileriniń» mamandary 127 úıdi aralap shyqty. 92 jaǵdaıda jylýmen jabdyqtaý normadan tómen boldy.

- Osy kópqabatty úılerge qyzmet kórsetetin PIK-terge ishki jylý júıesin retteý usynyldy. «Pavlodar jylý jelileri» parametrlerdi teńestirý boıynsha qosymsha jumys júrgizýde, - dedi Pavlodar qalasynyń ákimi Erjan Imanslıam. - Áleýmettik nysandarǵa keletin bolsaq, mektepter, balabaqshalar jáne basqa da mekemeler shtattyq rejımde jumys istep jatyr.

«Pavlodarenergo» AQ basshysy Oleg Perfılov qalaǵa jylý beretin energııa kózderi durys jumys istep turǵanyn aıtty.

- Negizgi másele keıbir úılerde shúmekterdiń alynyp tastalýynda. Nátıjesinde magıstraldyq jelilerge jaqyn úılerde jylý shamadan artyq bolyp, al aryraq ornalasqan kóp qabatty úılerge jylý jetpeı otyr. PIK-terdi úı ishindegi jelilerden alynyp tastalǵan shúmekterdi qalpyna keltirýge ıtermeleý qajet, - dedi Oleg Perfılov.

Óńir basshysynyń aıtýynsha, PIK basshylary tarapynan áreketsizdik nemese tártip buzýshylyq bolǵan jaǵdaıda, komıssııa jumysyna qatysýǵa jergilikti polıtsııa qyzmetin tartý qajet.

Ábilqaıyr Sqaqov jaqyn arada Pavlodardyń kóppáterli úılerindegi jylý jetkiliksizdiginiń naqty sebepterin anyqtaýdy jáne olar týraly kelesi jumys keńesinde baıandaýdy tapsyrdy.