Pavlodarda kisi óltirip, 13 jyl boıy qashyp júrgen qylmysker ustaldy

<p>ASTANA. KAZINFORM — Jyl basynan beri Іshki ister mınıstrliginiń jedel qyzmetteri izdeýde júrgen 300-den astam qylmyskerdi ustady, sondaı-aq habar-osharsyz ketken 200-den astam adam tabyldy, dep habarlaıdy Polisia.kz.</p>

— Máselen, Pavlodar oblysynyń kentteriniń birinde jedel-izdestirý sharalaryn júrgizý kezinde pavlodarlyq turǵyndy atys qarýymen atyp óltirgeni úshin 2011 jyldan beri halyqaralyq izdeýde júrgen Danat Bakıbaev ustaldy. Almaty oblysynda Sabyrjan Masahbaev ustaldy. Ol 2023 jyldyń aıaǵynda Almatyda top quramynda bola otyryp, aldyn ala sóz baılasý arqyly Sıngapýr azamatyna shabýyl jasap, 3 mln teńge men 13 myń AQSh dollarynan astam aqshasyn tartyp alǵan. Ustalǵan adamnyń sybaılastary buryn quryqtalǵan. Túrkistan oblysynda polıtsııa 10 jyl boıy halyqaralyq izdeýde júrgen Ózbekstan azamaty Jamshıd Ahmedovty ustady. Sheteldik Saryaǵash aýdanyndaǵy «Jibek joly» shekara beketinde shekaradan ótý kezinde qamaýǵa alyndy. Er adam 2014 jyldan beri Reseı Federatsııasynyń Irkýtsk qalasynda kisi óltirgeni úshin izdeýde bolǵan. ІІM jedel bólinisteriniń qyzmetkerleri Shymkentte kórshi memlekettiń quqyq qorǵaýshylary alaıaqtyq jasaǵany úshin izdep jatqan taǵy bir ózbekstandyq Marýfjon Jýraevty ustady, — dedi QR ІІM krımınaldyq polıtsııa departamenti basqarma bastyǵynyń orynbasary Jangeldi Tabılov.

Foto: vıdeodan alynǵan kadr

Aıta ketý kerek, ishki ister organdary júrgizetin izdestirý jumystary jasalǵan qylmys úshin jazanyń bultartpastyǵyn qamtamasyz etýdi kózdeıdi.