Pavlodarda kolledj basshysy 10 jyl boıy bıýdjet qarajatyn jymqyryp kelgen

<p>PAVLODAR. KAZINFORM - Pavlodar qalasyndaǵy tústi metallýrgııa kolledjiniń burynǵy basshysy memleketke 130 mln teńgeden astam materıaldyq shyǵyn keltirgeni úshin 7 jylǵa bas bostandyǵynan aıryldy. Buǵan qosa sot sheshiminen onyń esepshotyndaǵy qarajattyń barlyǵy tárkilendi.</p>

Pavlodar qalasynyń № 2 soty laýazymdy tulǵa B.-ǵa qatysty qylmystyq isti qarady. Ol 2013-2023 jyldar aralyǵynda tústi metallýrgııa joǵary kolledjiniń basshysy qyzmetinde júrip, bıýdjet qarajatyn jymqyrǵan.

«Kolledj basshysy jalǵan qyzmetkerlerdiń esepshotyna aı saıyn belgili kólemde jalaqy tólemderin júrgizip, ony ózi ıemdenip kelgen. Ádeıi burmalanǵan málimetteri bar jumys ýaqytyn esepke alý paraqtaryna qol qoıǵan. Sonyń saldarynan memleketke jalpy somasy 130 mıllıon teńgeden astam materıaldyq shyǵyn keltirilgen»,-dep habarlady №2 qalalyq sottyń baspasóz qyzmetinen.

Sot B.-ǵa bank shotyndaǵy aqshalaı qarajatyn tárkileýmen 7 jylǵa bas bostandyǵynan aıyrý jazasyn taǵaıyndady. Sondaı-aq ómir boıyna memlekettik qyzmette laýazymdardy atqarý quqyǵynan aıyrdy.

Úkim zańdy kúshine engen joq.

Eske sala keteıik, Pavlodarda elik atqandar sottaldy.