Pavlodarda Qolybaı alqabyndaǵy lımandy sýarý júıesi qalpyna keltirilip jatyr

<p>PAVLODAR. KAZINFORM &ndash; Pavlodardyń Maı aýdanyndaǵy Qolybaı alqabynda lımandy sýarý júıesin kúrdeli jóndeý jalǵasyp jatyr. Joba keler jyly aıaqtalsa, jańadan 14,6 myń gektar jerdi sýlandyrýǵa múmkindik bar. Qolybaı lımandy sýarý júıesin kúrdeli jóndeý jobasy bıyl bastalǵan. Atalǵan is-shara aıasynda Maı aýdany boıynsha 38 gıdrotehnıkalyq jáne 6 sý ótkizý qurylystary jóndeledi.&nbsp;</p>

– 2025 jyly bul jumystardyń barlyǵy aıaqtalady dep kózdelip otyr. Kúrdeli jóndeý aımaqtyń barlyq lımanyn sýmen qamtamasyz etip qana qoımaı, osy sýdy tıimdirek paıdalanýǵa múmkindik beredi. Jyl saıyn qyrkúıek aıynyń sońynda sý tasqyny kezeńine daıyndyq úshin Ertis ózeni boıyndaǵy Buqtyrma sý qoımasynan sý jiberiledi. Bul kóktemde erigen sýdy qabyldaýǵa oryn bosatýǵa jáne Ertis ózeniniń jaǵdaıyn jaqsartýǵa kómektesedi. Lımandardy osy ýaqytta da sýmen qanyqtyrýǵa múmkindik bar, - dep habarlady «Qazsýshar» RMK «Qanysh Sátbaev atyndaǵy kanal» fılıalynan.

Pavlodar oblysynda sý az kezeńde jaıylmalardyń sý basqan shalǵyndaryn qamtamasyz etý jáne Qanysh Sátbaev atyndaǵy kanal arqyly Ortalyq Qazaqstan óńirlerine aýyzsýdy úzdiksiz berý úshin jańa sý qoımasyn salý josparlanyp otyr. 

Aıta keteıik, Pavlodardaǵy jańa kanal keler jyly kóktemde iske qosylady.