Pavlodarda kiris qujattarynyń memlekettik tildegi úlesi 88 paıyzdy quraıdy
Bul týraly qalalyq mádenıet jáne tilderdi damytý bólimi tilderdi damytý bóliminiń sektor meńgerýshisi Meıram Nuǵyman málim etti, dep habarlaıdy pavlodarnews.kz .
«2007 jyldan bastap Pavlodar oblysy memlekettik tilde is júrgizýge tolyq kóshti. Sodan beri memlekettik organdarda, mekemeler men uıymdarda qazaq tilinde júrgiziledi. Búgingi kúni qala boıynsha memlekettik tildegi shyǵys qujattary 100 paıyz bolsa, kiris qujattary 88 paıyzdy quraıdy. Máselen, «Sý arnasy», «Pavlodarenergo» sııaqty jeke menshik kásiporyndardan kelgen kiris qujattary orys tilinde ǵana jazylady», - deıdi Meıram Nuǵyman. Spıkerdiń aıtýynsha, tamyz aıynda memlekettik qyzmette jáne bıýdjettik salada jumys isteıtin 240 adam «QAZTEST» júıesi boıynsha dıagnostıkalyq testileýden ótedi dep josparlanýda. Qazaqstanda biryńǵaı testileý júıesi bes jyldan beri júzege asyrylyp keledi. Test nátıjesi tórt kategorııa boıynsha baǵalanady. Synama test tegin júrgizilse, aqyly (shamamen 5000 teńge) testileýdiń nátıjesinde qazaq tilin meńgergeni týraly sertıfıkat beriledi. - Bizge tilderdi damytý basqarmasy kezekti testileý ótetini týraly habarlaıdy. Budan keıin barlyq memlekettik mekemeler men kásiporyndarǵa hat joldaımyz. Olar qatysýǵa nıet bildirgenderdiń tizimin beredi. Qatysýshylardyń kóbi mektep dırektorlary, mektepke deıingi bilim berý uıymdarynyń meńgerýshileri, memlekettik qyzmetshiler. Qazirgi tańda ázirge jumys isteıtin turǵyndar qatysady, ıaǵnı jappaı tekserý júrgizilmeıdi. Degenmen óz erkimen keletin bolsa, test tapsyrýyna bolady, - deıdi Meıram Nuǵyman. 2017 jyly 24-28 sáýir aralyǵynda ótkizilgen testileýge 59 memlekettik qyzmetshi jáne bıýdjettik salada jumys isteıtin 310 adam qatysqan. Onyń ishinde qazaq tilin ortasha deńgeıde meńgergen memlekettik qyzmetshilerdiń úlesi 45 paıyzdy qurasa, 2 paıyzy joǵary jáne 53 paıyzy bazalyq deńgeıde meńgergen. Bıýdjettik salada jumys isteıtin qyzmetshilerdiń 33 paıyzy qazaq tilin ortasha deńgeıde, 67 paıyzy bazalyq deńgeıde biledi.