Pavlodarda kelesi aptadan bastap jylý óshiriledi

<p>PAVLODAR. KAZINFORM - Qaladaǵy jylý jelilerin gıdravlıkalyq synaý, jóndeý jumystarynyń bastalýyna oraı oblys ortalyǵynda 15 sáýirden bastap ortalyqtandyrylǵan jylý berý toqtatylady. Keıbir shaǵyn aýdandarda bul ýaqytta ystyq sýmen qamtý da shekteledi.&nbsp;</p>

Bul týraly Pavlodar qalasynyń ákimdigi habarlady.

«Qala ákiminiń qaýlysyna sáıkes, 15 sáýir kúni Pavlodar qalasynda jylytý maýsymy aıaqtalady. Jylytý maýsymyn aıaqtaý týraly sheshim QR «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» zańy negizinde jáne syrtqy aýanyń turaqty oń ortasha táýliktik temperatýrasyna baılanysty qabyldandy», - dep málimdedi ákimdikten.

Bıylǵy jylý maýsymy 2023 jylǵy 18 qyrkúıekten bastalǵan.

Jylý berý maýsymy aıaqtalǵannan keıin pavlodarlyq JEO-daǵy negizgi 15 jabdyqty jáne shamamen 25 km jelige aǵymdaǵy jóndeý jumystaryn júrgizý josparlanyp otyr. Buǵan qosa Qamzın kóshesi boıynda JM-13 jańa jylý magıstraliniń jáne Abaı-Krıvenko kósheleri aýdanynda TSS-5 jańa sorǵy stantsııasynyń qurylysy júrgiziledi. Gıdravlıkalyq synaqtar Ońtústik jelilik aýdan boıynsha - 15-22 sáýir aralyǵynda, Soltústik jelilik aýdan boıynsha 26-30 sáýir aralyǵynda josparlanǵan.

Byltyr oblys ortalyǵyndaǵy úsh JEO-da 15 negizgi jabdyq pen 30 km jylý jelileri jóndeýden ótken. Nátıjesinde bıylǵy jylý berý maýsymynda jylý jelilerindegi aqaýlar 20%-ǵa azaıǵan.