Pavlodarda Qazaqstan shahmat federatsııasy fılıalynyń keńsesi ashyldy

<p>PAVLODAR. KAZINFORM - Qazirgi ýaqytta Pavlodar oblysynda shahmatpen 13 myńnan astam adam turaqty shuǵyldanady. Barlyq mektepte shahmat kabınetteri ashylǵan.</p>

Qazaqstan shahmat federatsııasy Pavlodar oblysy boıynsha fılıalynyń keńsesi ashyldy. Keńse oblys ortalyǵyndaǵy «Smart» bıznes ortalyǵynda ornalasqan. 

- Ashylý rásimine óńirlik dene shynyqtyrý jáne sport basqarmasynyń basshysy Azamat Imashev, Pavlodar oblystyq shahmat federatsııasynyń prezıdenti Artýr Shpeızer qatysty. Sondaı-aq ardagerlerge arnalǵan kabınettiń tusaýy kesildi. Munda ardagerler jınalyp, shahmat oınaı alady. Kabınet oıynǵa arnalǵan on tórt ústelmen jabdyqtalǵan,-dep habarlady óńirlik sport basqarmasynan.

Atap ótý kerek, Ertis-Baıan óńirinde búginde shahmat oıynymen 13 myńnan astam adam shuǵyldanady. Shahmat sportyn damytýǵa aıryqsha mán berilgen. Barlyq mektepte shahmat kabınetteri jumys isteıdi. Jan basyna qarjylandyrý baǵdarlamasy aıasynda 12 sektsııa ashylyp, 500 balany qamtyp otyr.

Eske sala keteıik, FIDE-niń TOP reıtıngine engen qazaqstandyq shahmatshylar 20 mln teńge syıaqy alady.