Pavlodarda qatygezdikpen óltirilgen 7 jasar Mılananyń anasyna psıhıatrııalyq saraptama jasalady

<p>PAVLODAR. KAZINFORM — Oblystyq mamandandyrylǵan aýdanaralyq sotta Mılana Davydovanyń ólimine sebepker bolǵan oqıǵa boıynsha qaralyp jatqan sot isi ýaqytsha toqtatyldy. Aıyptalýshy psıhıatrııalyq saraptamadan ótken soń qaıta jalǵasady. </p>

 Bul týraly óńirlik prokýratýradan habarlandy.

«Pavlodar oblystyq mamandandyrylǵan aýdanaralyq sotta aıyptalýshy Davydovaǵa qatysty sot isi ýaqytsha toqtatyldy. Sottalýshyny qorǵaýshy taraptyń ótinish haty boıynsha óltirilgen Mılana Davydovanyń anasyna qosymsha komıssııalyq statsıonarlyq sot-psıhıatrııalyq saraptama taǵaıyndaldy. Sol arqyly qylmys jasaý sátinde aıyptalýshynyń psıhıkalyq minez-qulqy qandaı kúıde bolǵany anyqtalady», dep málimdedi prokýratýradan.

Eske sala keteıik, ekinshi aıyptalýshy A. óziniń bul qylmysqa qatysqanyna shyn nıetten ókinetinin, biraq prokýrordyń aıyptaý aktisimen tolyq kelispeı otyrǵanyn buǵan deıin habarlaǵanbyz. 

Er azamat buǵan deıin birneshe márte sottalyp, ómiriniń 30 jyldan astam ýaqytyn temir tordyń ar jaǵynda ótkizgen.

Kóp jaǵdaıda merziminen buryn jáne raqymshylyqqa iligip bosap shyǵyp otyrǵan.

Sońǵy ret ózgeniń múlkin tonaǵany úshin bir jylǵa bas bostandyǵy shektelgen. Mılanany óltirý sátinde ol osy jazasyn ótep júrgen kórinedi.

Buǵan qosa aıyptalýshy A. tergeý barysynda ózin polıtseıler azaptaǵany týraly shaǵym túsirdi.

Onyń shaǵymy boıynsha qazirgi ýaqytta prokýratýra tergeý is-sharalaryn júrgizip jatyr.

Eske sala keteıik, Mılana byltyr 17 qarasha kúni Ekibastuzdan 50 shaqyrym jerdegi Besqaýǵa aýylynda joǵalyp ketti.

Osy kúni keshkisin saǵat 9:00 shamasynda qyzdyń anasy polıtsııaǵa shaǵym túsirdi. Mılanany eki táýlik boıy 400 adam izdedi.

Tipti izdeý jumystaryna tikushaq pen kınologtar da jumyldyryldy.

19 qarashada 7 jasar Mılananyń denesi qoqystan tabyldy.