Pavlodarda kámeletke tolmaǵan qyzben jynystyq qatynasqa túsken jigit sottaldy

<p>PAVLODAR. KAZINFORM - Jas jigit ózinen kishi ári 16 jasqa tolmaǵan qyzdy tósek qatynasyna tartqany úshin aıyp arqalady. Ári ol qylmys jasaý kezinde ózi de 18-ge tolmaǵany anyqtaldy.</p>

Pavlodar oblysy qylmystyq ister jónindegi mamandandyrylǵan aýdanaralyq soty on alty jasqa tolmaǵan adammen jynystyq qatynas nemese seksýaldyq sıpattaǵy ózge de áreketterdi jasaý faktisi boıynsha qylmystyq isti qarady.

Azamat K. óz kinásin moıyndap, qatań jazalamaýdy surady. Jábirlenýshi tarap jynystyq qatynas erikti túrde bolǵanyn túsindirip jáne K. qylmys jasaǵan kezde kámeletke tolmaǵandyqtan bas bostandyǵynan aıyrmaýdy surady.

- Jigittiń kinási jábirlenýshiniń, kýálardyń aıǵaqtarymen, saraptamalardyń qorytyndylarymen jáne sotta zerttelgen ózge de dáleldemelermen dáleldendi.

Qylmys aýyrlyǵy ortasha qylmystar sanatyna jatady jáne bas bostandyǵyn shekteý túrindegi jazany da kózdeıdi. Qylmys jasaýdyń mán-jaıyn jáne qylmys jasaǵan kezde kámeletke tolmaǵanyn eskere otyryp, K.-ǵa 1 jyl 6 aıǵa bas bostandyǵyn shekteý túrindegi jaza taǵaıyndaldy. Sebebi Qylmystyq kodekstiń 81-babyna sáıkes, kámeletke tolmaǵandarǵa aýyrlyǵy ortasha qylmystar úshin bas bostandyǵynan aıyrý taǵaıyndalmaıdy, - dep habarlady Pavlodar oblysy qylmystyq ister jónindegi mamandandyrylǵan aýdanaralyq sotynyń baspasóz qyzmetinen.

Er azamat eki jyl merzimge pedagogıkalyq jáne kámeletke tolmaǵandarmen jumys isteýge baılanysty laýazymdardy atqarý quqyǵynan aıyryldy.

Úkim zańdy kúshine engen joq.

Eske sala keteıik, esirtki qylmysy úshin 28 pavlodarlyq uzaq jylǵa sottaldy.