Pavlodarda Ǵalı Ormanovtyń 1948 jyly arab grafıkasynda jaryq kórgen kitaby tanystyryldy
Pavlodar qalasy, Buqar jyraý atyndaǵy ádebıet jáne óner mýzeıinde aqyn, jazýshy, aýdarmashy, jýrnalıst Ǵalı Ormanovtyń «Ómir dastany» atty kitabynyń tanystyrylymy ótti. Kórnekti qalamgerden mura bolyp qalǵan bul jádigerdiń ereksheligi, kitaptyń túpnusqasy elimizdiń ózge kitaphanalary men mýzeılerinde saqtalmaǵan.
Kitap arab grafıkasynda 1948 jyly jaryq kórgen. Basylyp shyqqan orny — Qazaqtyń memlekettik baspahanasy, «Qazaq eli» jýrnalynyń baspasy dep kórsetilgen. Jınaqta aqynnyń óleńderi toptastyrylyp berilgen. Atap aıtqanda, «Ana sabaǵy» dastany, «Alǵashqy adym», «Jolda», «Qýanysh», «Bizdiń aýyl», «Temir at», «Sheńber», «Ana tolǵaýy», «Qyrmanda», «Ustaz», «Bizdiń zaman» jáne taǵy basqa óleńderi basylǵan.
Jádigerdi aqynnyń jıen-nemeresi Aıdar Qyryqbaıuly mýzeıge amanattady.
Ǵalı Ormanov (1907-1978 jyldar aralyǵynda ómir súrgen) — búkil sanaly ǵumyryn ulttyq ádebıetimizdiń ósip-órkendeýine, qazaq poezııasynyń damýyna erekshe úles qosqan aqyn. Orystyń, Shyǵystyń klassıkalyq úlgilerin aýdaryp, qazaq ádebıeti salasyna ólsheýsiz úles qosqan aýdarmashy, asa qundy eńbekter jazǵan qajyrly tulǵa. Onyń qalamynan qazaq ádebıetine, qazaq rýhanııatyna aınalǵan óleńder jınaqtary, poemalary, jyr kitaptary, prozalyq jınaqtary jaryq kórip, ádebıetimizdiń altyn qazynasyna aınalǵan.