Pavlodarda esirtki tasymaldaýmen aınalysqan 19 jasar bozbala ustaldy

<p>PAVLODAR. KAZINFORM &mdash; Azamattan jalpy salmaǵy 29 gramm esirtkiniń jańa túrleri tabyldy. Bul zattardy ol ınternet arqyly satyp aldym dep túsindirgen.</p>

Esirtki qylmysyna qarsy is-qımyl bólimshesiniń jedel qyzmetkerleri esirtki taratqany úshin 19 jasar pavlodarlyqty ustady. Polıtseıler arnaıy monıtorıng júrgizý kezinde onyń tyıym salynǵan zattardy jasyryp júrgenin baıqaǵan.

«Jas jigittiń avtokóligin tekserý kezinde esiginen aq untaq tabyldy. Keıin saraptama kórsetkendeı, onyń sıntetıkalyq esirtki ekeni anyqtaldy. Al kúdiktiniń páterin tintý barysynda ishinde untaq zaty bar polımerli orama, qaptama materıaly, tarazy, polımerli oqshaýlaý lentasy jáne bekitkishi bar paketter tabyldy. Azamattan tárkilengen barlyq esirtkiniń jalpy salmaǵy 29 gramm, bul — sıntetıkalyq esirtkiniń jańa túri», dep habarlady óńirlik polıtsııa departamentinen.

Bozbala bul zattardy ınternettegi saıt arqyly tapqanyn, ony taratqany úshin áldekimder mol tabys ýáde etkenin jetkizgen. Telefonyna esirtki zattarynyń tyǵylǵan jerleri, olardy qaıda ornalastyratyny jaıly aqparattar kelip otyrǵan.

Qazir ol ýaqytsha qamaý ornyna ornalastyrylyp, sotqa deıingi tergeý-tekserý júrgizilip jatyr.