Pavlodarda «Ertis-Baıan» І respýblıkalyq teatr festıvali bastaldy
J.Aımaýytov atyndaǵy Pavlodar oblystyq qazaq mýzyka-drama teatrynda «Ertis-Baıan» I respýblıkalyq teatrlar festıvali bastaldy.
Atalǵan teatr basshysy Arman Temirbektiń aıtýynsha, óner ujymdarynyń dodasy J.Aımaýytovtyń 135 jyldyǵyna arnalyp otyr.
— Respýblıkalyq aýqymdaǵy festıval Pavlodar oblysy ákimdiginiń qoldaýymen uıymdastyrylýda. Mundaı iri teatrlar syny Ertis-Baıan óńirinde osydan onshaqty jyl buryn ótken eken. Araǵa biraz jyl salyp dástúrli is-shara jalǵasyn tapty. Festıval otandyq teatr ónerindegi úzdik jumystardy, zamanaýı teatr úrdisiniń negizgi tendentsııalaryn anyqtaý jáne teatr óneriniń klassıkalyq, zamanaýı muralary arasyndaǵy shyǵarmashylyq baılanysty nyǵaıtý, akterlik kásibı deńgeıdi shyńdaý, teatr álemindegi jańa esimderdi anyqtaý maqsatynda ótip jatyr. Elimizdegi eń úzdik degen spektaklder Pavlodar tórinde qoıylyp, jergilikti kórermen de ózge akterlerdiń ónerine qaryq bolady degen oıdamyz. Bul festıvaldegi negizgi talap — qatysatyn jumystar buryn ózge teatrlardyń sahnasynda qoıylmaýy kerek ári sońǵy bir jyl ishinde premerasy ótken bolýy tıis. Bul bizdiń ózge áriptesterimizdiń arasyndaǵy básekelestikti arttyra túsedi degen senimdemiz, -deıdi A.Temirbek.
Respýblıkalyq synǵa elimizdiń túpkir-túpkirinen 11 teatr, atap aıtqanda J.Aımaýytov teatrynan bólek, S.Qojamqulov atyndaǵy Ulytaý oblysynyń qazaq mýzykalyq-drama teatry, Abaı atyndaǵy Abaı oblystyq qazaq mýzyka-drama teatry, S. Muqanov atyndaǵy qazaq sazdy-drama teatry, S. Seıfýllın atyndaǵy Qaraǵandy oblystyq akademııalyq qazaq drama teatry, Á.Mámbetov atyndaǵy memlekettik drama jáne komedııa teatry, Q.Qýanyshbaev atyndaǵy Qazaq ulttyq mýzykalyq drama teatry, Sh.Qusaıynov atyndaǵy Aqmola oblystyq qazaq mýzykalyq-drama teatry, Astana qalasy ákimdiginiń «Jastar» teatry, Shyǵys Qazaqstan oblystyq drama teatrynyń jas kórermen trýppasy, B.Rımova atyndaǵy Taldyqorǵan drama teatry baǵyn synaýda.
Alǵashqy kúni kórermender pavlodarlyq akterler sahnalaǵan Shekspırdiń «Rıchard ІІІ» qoıylymyn tamashalady.
Akterlerdiń ónerin Qazaqstannyń eńbek sińirgen qaıratkeri, M.Áýezov atyndaǵy Qazaq ulttyq drama teatrynyń dırektory Erkin Jýasbek bastaǵan qazylar alqasy baǵalaıdy.
Eske sala keteıik, Pavlodarda alǵash ret respýblıkalyq teatrlar festıvali ótetinin jazǵanbyz.