Pavlodarda eńbek mıgranttarynan para alyp kelgen polıtseıler sottaldy

PAVLODAR. QazAqparat - Ulttyq qaýipsizdik komıteti Pavlodar oblystyq polıtsııa departamenti kóshi-qon qyzmetkerleriniń sottalýyna qatysty túsinik berdi, dep habarlaıdy QazAqparat komıtettiń baspasóz qyzmetine silteme jasap.

UQK Pavlodar oblysy boıynsha departamenti ótken jyly qarashada Pavlodar oblysy Aqsý qalasy polıtsııa bóliminiń kóshi-qon qyzmeti bólimi bastyǵynyń mindetin atqarýshy, polıtsııa maıory E. Asaınovtyń, sondaı-aq osy bólimsheniń ınspektorlary polıtsııa kapıtany D. Alaev pen polıtsııa kapıtany S. Baıazıttiń zańǵa qaıshy áreketteriniń jolyn kesti.

«Olar TMD elderinen kelgen eńbek mıgranttaryn tirkeý kezinde júıeli túrde aqshalaı syıaqy alyp kelgen. Atalmysh polıtseıler 2019 jylǵy 26 qyrkúıekte Aqsý qalalyq sotynyń úkimimen QR QK 394-baby 2-bólimi (Zańsyz kóshi-qondy uıymdastyrý), 361-baby 1-bólimi (Laýazymdyq ókilettigin teris paıdalaný), 366-baby 3-bólimi 1, 2, 4-tarmaǵy (Para alý) boıynsha kináli dep tanyldy» delingen habarlamada.

Sottalýshylar memlekettik qyzmette eńbek etý quqyǵynan ómir boıyna aıyryldy. Árqaısysyna para somasynan otyz bes ese artyq mólsherde, ıaǵnı 5 mln 250 myń teńge aıyppul salyndy.