Pavlodarda «Elbasy joly. Astana» fılminiń tusaýkeseri ótti

PAVLODAR. QazAqparat - Táýelsizdik kúni merekesine oraı oblys ortalyǵyndaǵy Festival Cinema Dolby Atmos 3D kınoteatrynda Prezıdent jáne elordamyz Astananyń qalyptasý kezeńin qamtıtyn fılmniń kórsetilimi ótti, dep habarlaıdy pavlodarnews.kz. 

Qala turǵyndarymen birge fılmdi oblys ákimi Bolat Baqaýov tamashalady. Prezıdenttiń elordany Astanaǵa kóshirý jónindegi bastamasynyń júzege asyrylǵany týraly kınokartınanyń kórsetilimi pavlodarlyqtardyń úlken qyzyǵýshylyǵyn týdyrdy. Bos oryndar bolǵan joq.

«Fılm qatty unady,  Ásirese, jańa Astanaǵa elimizdiń memlekettik rámizderi ákelingen sát tebirentti. Oǵan qosa, Prezıdentimizdiń elordanyń resmı tusaýkeseri kezinde kosmos keńistiginde bolǵan ǵaryshker Talǵat Musabaevpen tikeleı efırdegi suhbaty zor áser etti»,- deıdi qala turǵyny Álııa Jumatova

S. Toraıǵyrov atyndaǵy PMÝ qazaq tili kafedrasynyń meńgerýshisi Aıman Zeınýllınanyń pikirinshe, rejısser Elbasynyń ishki jan-dúnıesi men Astana týraly kúni-túni oı-paıymdaryn jaqsy bere bilgen. «Basty róldi somdaǵan akter de óz mindetin jaqsy oryndap shyqty. Astananyń salyna bastaǵan kezinde ózim sol jerde aspırantýrada oqyǵanmyn. Sondyqtan bári esimizde. Rızamyz», - deıdi Aıman Zeınýllına.

Aıta ketsek, «Elbasy joly. Astana» fılmi elordanyń Almatydan Astanaǵa kóshirilýi týraly baıandaıdy. Bul tarıhı sheshim 1994 jyldyń shilde aıynda qabyldanǵan bolatyn. Fılm rejısseri Aqan Sataev, basty róldi somdaǵan teatr jáne kıno akteri Murat Aqmanov.