Pavlodarda dáýlesker kúıshiniń qurmetine respýblıkalyq dombyrashylar konkýrsy bastaldy

<p>PAVLODAR. KAZINFORM - Pavlodarda Qazaq KSR halyq artısi, dáýlesker kúıshi Rústembek Omarovtyń 105 jyldyǵyna arnalǵan І respýblıkalyq jas dombyrashylar konkýrsy bastaldy. Kúıshiler básekesine elimizdiń 12 óńirinen 32 dombyrashy qatysyp jatyr.</p>

Foto: Esenjol Isabek

Isa Baızaqov atyndaǵy Pavlodar oblystyq fılarmonııa basshysynyń shyǵarmashylyq jónindegi orynbasary Sáýle Muqaevanyń aıtýynsha, dombyrashylar dodasynda Astana, Almaty, Óskemen, Qyzylorda, Qostanaı, Atyraý, Pavlodar, Kókshetaý, Shymkent, Taraz, Qaraǵandy qalalary men birge Abaı oblysynan 32 ónerpaz baqtaryn synaýda.

Úsh kezeńnen turatyn shyǵarmashylyq jarysta R.Omarovtyń repertýarynda bolǵan «Aqsaq qulan» (halyq kúıi), «Qos ishek» (Dáýletkereı), R. Omarovtyń «Jastyq shaq», S. Shabelskıı men L. Shaıgorodskııdiń «Toıbastar» kúıleriniń oryndalýy mindetti. Sondaı-aq qatysýshylar óz tańdaýy boıynsha birneshe kúı oryndaıdy.

Foto: Esenjol Isabek

Rústembek Omarov Pavlodar oblysy, Aqqýly aýdanynda dúnıege kelgen. Esimi ańyzǵa aınalǵan óner tarlany nebári 15 jasynda jańadan qurylǵan qazaq ult aspaptar orkestrine dombyrashy retinde qabyldanǵan. Dombyrashynyń oryndaý mánerin Ahmet Jubanov óte joǵary baǵalap, óziniń «Ǵasyrlar pernesi» atty eńbeginde: «Rústembek kúıdi «shegelep», shapshań, jaı keletin býyndaryn bárin de tastaı túıip, ekpinin aýystyrmaıdy. Ortasha uzyndyqtaǵy saýsaqtarymen bir notany jaza baspaı, bárin de óz ornynda etip oryndaıdy»,-dep jazyp qaldyrǵan.

Qazylar alqasynyń tóraǵasy, QR eńbek sińirgen artısi, Qazaq Ulttyq óner ýnıversıtetiniń professory Turar Álipbaev vırtýoz dombyrashy, Qurmanǵazy orkestriniń solısi jáne kontsertmeısteri bolǵan Rústembek Omarovtyń ómirine qatysty keıbir derektermen bólisti.

Foto: Esenjol Isabek

- Bozbala Rústembekti júzdegen dombyrashynyń qatarynan tańdap alǵan Ahań onyń ónerin erekshe qurmettegen. Qurmanǵazy orkestrine ólsheýsiz eńbek sińirdi. Bul orkestrde kóptegen dombyra júırikteri bolǵanymen, R.Omarovtyń esimi aıryqsha atalǵan. Ony Ahmet Jubanov qýǵyndalýdan aman alyp qalǵany týraly derekter de bar. Dáýlesker kúıshi Seıtenniń kúıin Seıtenshe, Qurmanǵazynyń kúıin Qurmanǵazysha, Táttimbettikin Táttimbetshe babyna keltirip tartqan eken. Ereksheligi, kúıdi qandaı ekpinmen bastasa, sońyn dál sondaı ekpinde aıaqtap otyrǵan. Mundaı ekpinge búginde keıbir kásibı kúıshilerdiń ózi shydas bermeıdi. Kóptegen kúılerdiń túpnusqasy bizdiń zamanymyzǵa Rústembek sııaqty naǵyz maıtalman dombyrashylardyń oryndaýynda jetip otyr,-deıdi ol.

Kúıshiler baıqaýy 15 qarashaǵa deıin jalǵasady. Konkýrstyń uıymdastyrýshylary - Pavlodar qalasynyń ákimdigi, Estaı atyndaǵy mádenıet saraıy, Isa Baızaqov atyndaǵy oblystyq fılarmonııasy, Pavlodar qalasyndaǵy «Mýzykalyq kolledj – daryndy balalarǵa arnalǵan mýzykalyq mektep-ınternat kesheni».

Eske sala keteıik, buǵan deıin Pavlodarda dáýlesker kúıshi Rústembek Omarovtyń dombyrasy saqtalyp turǵany týraly jazǵan edik.