Pavlodarda dámhana meımandaryn uryp-soqqan polıtseılerge qatysty tergeý bastaldy

ASTANA. QazAqparat - Pavlodar qalasyndaǵy polıtsııa qyzmetkerleriniń kafege kelýshilerin uryp-soǵýyna qatysty arnaıy tergeý bastaldy. Bul týraly jedel brıfıng ótkizgen qala prokýrory Erjan Bólegenov málim etti, dep habarlaıdy 24.kz .

Atyshýly beınerolık YouTube áleýmettik jelisinde jarııalandy. Vıdeoda polıtsııa qyzmetkeriniń formasyndaǵy adamnyń jas jigitterdi uryp jatqanyn kórýge bolady.

Tergeýdi Pavlodar qalalyq prokýratýrasy baqylaıdy. Tártip saqshylarynyń azamattyq tulǵalarǵa qatysty zańsyz áreketi oblys ortalyǵyndaǵy «Araı» dámhanasynyń mańynda bolǵan.

Jalpy is boıynsha tórt polıtseı tergelip, túsinik berip jatyr. Aıta keteıik, qazirgi ýaqytta zardap shekken eki azamat anyqtaldy. Olardyń densaýlyǵy jaqsy. Bul derek boıynsha QR Qylmystyq kodeksiniń 362-babynyń 4-tarmaǵy boıynsha qylmystyq is qozǵaldy. 

«Bul rolık qoǵamda ǵana emes, quqyq qorǵaý organdarynda daý týdyrdy. Polıtseı qyzmettik babyn asyra paıdalanǵan. Osyǵan baılanysty oblys prokýrorynyń tapsyrmasymen derekke qatysty tergeý barysy bizdiń baqylaýymyzǵa alyndy. Patrýldik qyzmet ókilderiniń biri ýaqytsha qamaý ızolıatoryna toǵytyldy. Oǵan QR Qylmystyq kodeksiniń 362-baby 4-tarmaǵy boıynsha aıyp taǵyldy», - dedi qala prokýrory Erjan Bólegenov.