Pavlodarda «Bıznestiń jol kartasy-2020» baǵdarlamasyn júzege asyrýǵa 1 876, 3 mln teńge bólindi

ASTANA. QazAqparat -  «Nur Otan» partııasy Pavlodar oblystyq fılıalynda oblystyq máslıhaty depýtattarynyń «Bıznestiń jol kartasy-2020» jáne Joldaýdy túsindirý jónindegi aýyldyq okrýgtar kásipkerlerimen dóńgelek ústeli ótti.

Pavlodar qalalyq kásipkerlik jáne aýyl sharýashylyǵy bólimi basshysy Rýslan Tileýlesovtiń bergen aqparatyna qaraǵanda, «Bıznestiń jol kartasy-2020» baǵdarlamasyn júzege asyrý kezinde 2010-2016 jyldar aralyǵynda 666,6 mlrd. teńge somasyna 648 joba maquldanyp, 2000 myńnan astam jańa jumys orny ashyldy. Sondaı-aq, 2017 jyly «Bıznestiń jol kartasy-2020» baǵdarlamasyn júzege asyrýǵa 1 876, 3 mln teńge bólingen, dep xabarlaıdy pavlodarnew.kz .

   - Shaǵyn jáne orta kásipkerlikti damytýdaǵy bıznes-klımatty jaqsartý jónindegi jumys jalǵasýda. Sonymen birge, jańa ınvestıtsııalyq jobalardy izdestirý jónindegi jumys turaqty túrde júrgizilýde, - dedi ol.  

Odan bólek, otyrys barysynda «Nurly jol» jáne «Nurly jer» memlekettik baǵdarlamalaryn júzege asyrý, atalmysh baǵyttar boıynsha qarajatty ýaqtyly jáne tıimdi ıgerý máseleleri qarastyryldy. Partııanyń Pavlodar qalalyq fılıaly tóraǵasynyń birinshi orynbasary Náılá Ahmetova fılıaldyń atalǵan memlekettik baǵdarlamalarǵa monıtorıng jasaý jáne baqylaý jónindegi jumysymen tanystyrdy. Onyń aıtýynsha, partııalyq monıtorıng jáne baqylaý jónindegi toptar 23 nysandy teksergen. Bul nysandarda jumys josparǵa sáıkes júrgizilýde.  

- Eseptik kezeń ishinde «Nurly jol» jáne «Nurly jer» baǵdarlamalary boıynsha «Saryarqa» móltekaýdanynda №4, 5, 8, 13, 13A, 14 jańa kópqabatty úılerge partııalyq toptardyń 8 issapary, depýtattyq fraktsııanyń 2 otyrysy, partııalyq baqylaý komıssııasy men sybaılaıs jemqorlyqqa qarsy áreket qoǵamdyq keńesiniń otyrysy ótkizildi. Atalǵan nysandardaǵy jumys bekitilgen josparǵa sáıkes júzege asyrylýda, - dedi N. Ahmetova.