Pavlodarda bet-álpetti tanıtyn beınebaqylaý kameralary polıtsııaǵa úlken kómek bolyp tur

<p>PAVLODAR. KAZINFORM - Qazirgi ýaqytta oblys aýmaǵynda qoǵamdyq qaýipsizdikti qadaǵalaýǵa baǵyttalǵan jalpy sany 60 myńnan astam beınebaqylaý kamerasy ornatylǵan. Saýda úıleri urlyq áreketteriniń aldyn alý úshin bet-álpetti taný fýnktsııasy bar qurylǵylar qoıa bastaǵan.</p>

Jyl basynan óńirdegi saýda nysandarynda 45 urlyq tirkelgen. Onyń 17-si saýda úılerinde, iri dúkenderde jasalǵan. Pavlodar oblysy Polıtsııa departamenti jergilikti polıtsııa qyzmeti basqarmasy bastyǵynyń orynbasary Rýfat Kenjınnyń aıtýynsha, jalpy óńirde ashylmaǵan qylmystar boıynsha 1102 qylmysker izdeýde júr. Onyń ishinde bıyl 31 adamǵa izdeý jarııalandy.

«Óńirde 60 561 beınebaqylaý kamerasy bar. Oblys ortalyǵynda beınebaqylaý jedel basqarý ortalyǵynyń (JBO) 117 kamerasymen júzege asyrylady. Bul ortalyq qajet bolsa 14 750 beınebaqylaý kamerasyna onlaın túrde qol jetkize alady. Qolda bar kameralar arqyly jyl basynan beri 36 qylmystyq qylmys ashylyp, 3187 ákimshilik quqyq buzýshylyq anyqtaldy. Pavlodar qalasynda qaýipsizdik maqsatynda ozyq tehnologııalardy paıdalanatyn saýda núkteleri bar. Máselen, «Skıf Treıd» JShS jáne «Atrıým» PKF JShS ózderiniń saýda jelilerinde bet-álpetti taný fýnktsııasy bar beınebaqylaý kameralaryn ornatqan. Bul kameralar onlaın rejıminde polıtsııany qyzyqtyratyn azamattardyń jeke basyn anyqtaýǵa múmkindik beredi», - dep atap ótti R.Kenjın Pavlodar oblysy kásipkerler palatasynda ótken jıynda.

Kásipkerlerdiń sózinshe, jańa tehnologııanyń saqtaý bazasynda ázirshe 50 adam týraly derekti ǵana saqtaýǵa bolady. Keleshekte málimetter qoryn keńeıtý josparlanyp otyr.

Eske sala keteıik, buǵan deıin Pavlodardaǵy jedel basqarý ortalyǵy qalaı jumys isteıtini týraly fotoreportaj usynǵan edik.