Pavlodarda bes birdeı qurylys kompanııasy kúmándi shemanyń qurbany boldy

<p>PAVLODAR. KAZINFORM - Pavlodarlyq qurylys kompanııalary alaıaq fırmanyń qıturqy áreketinen mıllıondaǵan shyǵynǵa ushyrap otyr. Aralyq merdigerden qurylys jáne jóndeý jobalaryn qabyldap alǵan jergilikti kásiporyndar atqarǵan jumystary úshin tıesili tólemderin ala almaı, san soǵyp qaldy. Máselege qazir prokýratýra organdary aralasyp jatyr.</p>

Másele bylaı, zańdy mekenjaıy Shymkent qalasynda ornalasqan «GradStroıServıs» JShS memlekettik satyp alýlar portaly arqyly Pavlodar oblysy boıynsha 9 jobany utyp alǵan. Úlgilik sharttar Jetekshi mektebiniń ǵımaratyn kúrdeli jóndeý, Aqsýdaǵy Saryshyǵanaq mektebiniń ǵımaratyn kúrdeli jóndeý jáne aýlasyn abattandyrý, oblystyq mamandandyrylǵan balalar úıiniń qasbetin kúrdeli jóndeý jáne aýlasyn abattandyrý, aqparattyq tehnologııalar kolledjiniń aýlasyn jóndeý, Ertis aýlynda sport qurylystaryn salý jáne dene shynyqtyrý-saýyqtyrý keshenin abattandyrý, sondaı-aq Aqsýdaǵy turǵyn úıler aýlalaryn abattandyrý boıynsha jasalǵan. Shart tarmaqtarynda oryndaýshy tapsyrys berýshiniń kelisiminsiz óziniń mindettemelerin tolyqtaı nemese ishinara ózge sýbektige bere almaıtyny týraly taıǵa tańba basqandaı etip jazylǵan. Alaıda «GradStroıServıs» JShS ózi utyp alǵan jobalardy atqarý mindetin bir demmen aralyq merdiger «ADS-N group» JShS-ne aýdara salǵan. Al sońǵy atalǵan fırmanyń qurylys salasyndaǵy tájirıbesi atymen joq kórinedi.

- «ADS-N group» JShS aralyq merdiger retinde pavlodarlyq bes kompanııamen, atap aıtqanda, «Santeh Expert PV», «Kún Jaryq», «SK GenStroıPlan», «Asfaltobeton-PV», «INTERLAIT Pavlodar» jaýapkershiligi shekteýli seriktestikterimen jumysty atqarý týraly kelisimge keledi. «ADS-N group» JShS de ońtústik óńirden, 2022 jyly Túrkistan oblysyndaǵy Jetisaı qalasynda tirkelgen. Kásiporyn shtatynyń esebinde bir ǵana adam – dırektor ǵana esepte tur. Al «GradStroıServıs» JShS-inde óz mindettemelerin ózgege berý týraly tapsyrys berýshimen jasaǵan jazbasha kelisimi joq. Negizgi sharttarda jobadaǵy jumysty birlesip oryndaıtyn merdigerler tartylǵan jaǵdaıda tapsyrys berýshige barlyq aralyq merdigermen jasalǵan kelisimderdiń kóshirmesin usynatyny kórsetilgen. Buǵan qosa aralyq merdigerde (ıaǵnı «ADS-N group» JShS) oryndalatyn jumys kólemderin ózge aralyq merdigerge berý quqyǵy zań júzinde bolmaǵan. Ǵımarattar memlekettik satyp alýlardyń máni bolǵandyqtan, oǵan erejelerde tyıym salynǵan, - dep túsindirdi zardap shegýshi bes kompanııanyń quqyǵyn qorǵaýshy advokat Almagúl Bahralınova.

«ADS-N group» kompanııasy osyndaı talaptarǵa qaramastan pavlodarlyq bes aralyq merdigermen óz betinshe kelisimge kelgen. Al jergilikti kásiporyndar jumystardy mejeli merzimde tolyq oryndap shyqqan. Alaıda «ADS-N group» JShS jumystardyń oryndalǵany týraly aktige áli kúnge qol qoımaı, tólem jasaýdan qashyp otyr. Aralyq merdigerler ony sotqa beripti. Ókinishke qaraı, sharttar boıynsha bereshekti óndirip alý týraly sot sheshimi oryndalar emes. Jobalarǵa tapsyrys berýshi mekemeler oryndalǵan jumystar úshin tólemdi tolyq túrde «GradStroıServıs» JShS-niń esepshottaryna aýdaryp jibergenimen, odan pavlodarlyq qurylysshylarǵa soqyr tıyn da buıyrmaı otyr. Sebebi aralyq fırma «ADS-N group» jabylyp qalǵan.

- Biz «GradStroıServıs» JShS-ne shaǵymdanyp bardyq. Ondaǵylar tıesili somany «ADS-N group» kompanııasyna tólegenin jáne barlyq óndirip alý týraly shaǵymdardy solarǵa jiberý kerektigin jetkizdi. Máseleni baıyptaı kele, «ADS-N group» JShS Ádilet mınıstrliginiń boryshkerler reestrinde turǵanyn jáne ol sýbekti retinde jumysyn toqtatqanyn anyqtadyq. Al onyń ıeliginde óndirip alýǵa jatatyn múlik atymen joq. Bizdiń oıymyzsha, «GradStroıServıs» JShS bul kúmándi alaıaqtyq shemany aldyn ala oılastyrǵan. Ol qarjylyq paıda tabý úshin «ADS-N group» sııaqty bir kúndik jalǵan fırmany ádeıi qurǵan degen pikirdemiz. Osylaısha, aralyq merdigerlerge tıesili tólemderdi berýden zańsyz túrde jaltaryp otyrǵany anyq, - deıdi advokat.

Almagúl Bahralınovanyń aıtýynsha, «GradStroıServıs» memlekettik satyp alýlar portalynda áli de sharttar jasasyp, álgindeı kúmándi shemalardy qoldanyp jatyr. Fırma utyp alǵan tenderlerin kúmándi ári salada múlde tájirıbesi joq kompanııalarǵa ustata salady eken. Ári qaraı ol joǵarydaǵydaı stsenarıımen jalǵasyn taýyp, saldarynan jumysyn adal atqaryp otyrǵan aralyq merdigerler san soǵyp qalyp jatyr.

«Santeh Expert PV», «Kún Jaryq», «SK GenStroıPlan», «Asfaltobeton-PV», «INTERLAIT Pavlodar» jaýapkershiligi shekteýli seriktestikteri qazirgi ýaqytta óte úlken somadaǵy shyǵyndarǵa batyp otyr. Olar álgi jobalardy óz qarajattaryna atqaryp shyqty. Endi tólenýge tıis qarajat esebinen qyzmetkerlerdiń eńbekaqysy, materıaldarǵa, tehnıkalarǵa jáne ózge de baǵyttarǵa jumsalǵan shyǵyndar jabylýy kerek edi. Máselege jaýapty organdar, ásirese prokýratýra keńinen aralasyp, «GradStroıServıs» men «ADS-N group» kompanııalaryn jaýapkershilikke tartýdy suraımyz. Adal kásipkerlerdiń quqyǵy aıaqqa taptalyp otyr. Olardyń tıesili tólemderi qaıtarylýy kerek», - deıdi A.Bahralınova.

Pavlodar oblysy prokýrorynyń kómekshisi Ashat Atıkeev bul máselege eń áýeli ishki memlekettik aýdıt departamenti tartylatynyn málimdedi. Eger mekeme qurylys kompanııalaryna shyǵynnyń shynymen keltirilgenin anyqtasa, onda tekserý materıaldarynyń qorytyndysy qadaǵalaýshy organǵa tapsyrylyp, qylmystyq is qozǵalady. Qazirgi ýaqytta bul túıtkilge óńirlik kásipkerler palatasy da aralasyp, múddeli organdardyń ózara baılanysyn úılestirýge kiristi.

Eske sala keteıik, pavlodarlyqtardyń 223 mln teńgeden astam qarjysyn aldap alǵan kúdikti Reseıde ustaldy.