Pavlodarda barlyq baǵyttaǵy avtojoldar ashyldy
13:04, 09 Aqpan 2024
<p>PAVLODAR. KAZINFORM - Ótken túnde oblystaǵy avtojoldarda shekteý jasalǵanyna baılanysty 354 kólik joldarda jınalyp qalǵan. Jylytý pýnktterine 112 adam jetkizildi.</p>
Óńirlik tótenshe jaǵdaılar departamentinen habarlaǵandaı, búgin saǵat 11.30-da barlyq baǵyttaǵy avtojoldar ashyldy.
«Bir túnde oblys aýmaǵyndaǵy joldarda jalpy sany 354 tehnıka jınalyp qaldy. Onyń ishinde 232 júk kóligi, 116 jeńil avtomobıl, 6 avtobýs bar. Jolda turyp qalǵan adamdar sany – 642, onyń ishinde 8 bala bar» dep málimdedi departamentten.
«Vita» eriktiler jasaǵynyń músheleri Ekibastuz qalasynyń tótenshe jaǵdaılar basqarmasymen birlesip, «Astana-Pavlodar» tas jolynda júrgizýshilerge ystyq shaı men jeńil pisirilgen tamaq úlestirdi.
Buǵan qosa TJD kúshteri qar qursaýynda qalǵan «Gazel» avtokóligindegi adamdardy aman-esen evakýatsııalaǵan.