Pavlodarda avtobýstar tegin júretin azamattardy tasymaldaýdan bas tartqan

PAVLODAR. QazAqparat - Pavlodarda avtobýs jolaýshylaryn ábigerge salǵan másele rettelip, tasymaldaýshy men ákimdik kelisimge keldi. Degenmen, osy jaǵdaıǵa baılanysty qala ákimi sógis aldy, dep habarlaıdy pavlodarnews.kz.

Aıta keteıik, 1 naýryz kúni Pavlodarda jolaýshy tasymaldaýshylar ózderiniń habarlandyrýymen jurtty tań qaldyrdy. Onda bylaı dep jazylǵan edi:

«Jeńildigi bar azamattar, ákimdikte sizderdiń jol aqyńyzdy tóleıtin aqsha joq, sondyqtan ony ózderińiz tóleısizder!».

Habarlandyrýdyń fotosy áleýmettik jeliler arqyly taraǵan. Zeınetkerler tańerteńgi ýaqyttan beri jol aqysyna ádettegi 40 emes, 80 teńge tólegenin aıtyp shaǵymdandy. Habarlandyrý jarty kún boıy qaladaǵy 6 baǵyt boıynsha qatynaıtyn avtobýstarda ilinip turdy. Olar - №1, 1E, 2, 9, 18, 27 avtobýstar.

Odan keıin tasymaldaýshy ákimdikpen kelisimge kelgennen keıin bolar, habarlandyrýdy alyp tastap, jeńildikter qalpyna keldi.

Іzin ala jelilerde «Pavlodar avtokombınaty» JShS dırektory Aleksandr Panchenkonyń beınehabarlandyrýy tarady.

«Búgingi jaǵdaı oryn almaýy tıis edi. Óıtkeni, qala ákimimen kelisim sársenbi kúni jasalǵan bolatyn. Qazirgi ýaqytta bizdiń avtobýstar kúndelikti tártipte jumys isteýde. Habarlandyrýlar alynyp tastaldy, - dedi Aleksandr Panchenko.

Búgin oqıǵa týraly qala ákiminiń baspasóz qyzmeti pikir bildirdi.

- Jeńildetilgen jolaqy men tegin júrý quqyǵy 7 sanattaǵy azamattar úshin saqtalady. 2020 jyly qalalyq bıýdjette tasymaldaýshylar shyǵynyn óteý úshin qarjy qarastyrylǵan. Ol qarjy belgili sanattaǵy azamattardy jeńildikpen jáne tegin tasymaldaýdy júzege asyratyn uıymdarǵa beriledi. 8 tasymaldaýshynyń ishinde bólingen qarjymen tek №№ 1, 1E, 2, 9, 18, 27 baǵyttarda qyzmet kórsetetin «Pavlodar avtokombınaty» JShS kelispedi. Atalǵan baǵyttarda tasymaldaý kelisimshartqa sáıkes kúndelikti tártippen júzege asýda. ıAǵnı, belgili sanattaǵy azamattar óz jeńildigin paıdalana alady, - dedi baspasóz qyzmetinde.

Búgin oblys basshysy Pavlodar qalasynyń ákimi Qaırat Núkenovke qalanyń sanıtarlyq tazalaý jumystaryn tómen deńgeıde júrgizgeni jáne qarym-qatynas máselelerindegi, atap aıtqanda, tasymaldaýshylar men turǵyndar arasynda úılestirýdiń mardymsyzdyǵy úshin sógis berdi .

Eske salaıyq, buǵan deıin oblys ortalyǵynda tasymaldaýmen aınalysatyn pavlodarlyq fırmalar qala ákimine ashyq hat jazyp, 2020 jyldyń 1 naýryzynan bastap 7 sanattaǵy azamattar úshin jeńildikten bas tartatynyn málimdegen bolatyn. Olardyń arasynda zeınetkerler, ekinshi toptaǵy múgedekter, mektep jasyndaǵy balalar, kópbalaly otbasynyń stýdenti, kópbalaly analar, 23 jasqa deıingi jetimder, stýdentter, AÁK alatyndar bar.