Pavlodarda aýtıst balalarǵa arnalǵan ortalyq ashyldy
18 jasqa deıingi balalarǵa arnalǵan ortalyq tegin qyzmet kórsetedi.
Aýtızmi bar balalarǵa zamanaýı mamandandyrylǵan baǵdarlamalar boıynsha qoldaý kórsetetin ortalyqtyń ashylýyn eń aldymen olardyń ata-analary kútti. Olar oblys ákimi Ábilqaıyr Sqaqovtan óńir turǵyndary aldynda esep berýi kezinde qoldaý kórsetýin suraǵan bolatyn. Másele qolǵa alynǵan kezde ǵımaratty tańdaýda qıyndyq týyndady – ol erekshe balalarmen júrgiziletin jumystyń talabyna sáıkes kelýi kerek edi. Degenmen, mundaı ǵımarat Lýnacharskıı kóshesindegi 28-úıden tabyldy. Jańa ortalyq ǵımaratyn osynda emdeletin balalardyń ata-analary unatty.
«Bul – bárimiz úshin óte qýanyshty kún. Erekshe balalar tárbıelep otyrǵan kóptegen ata-analar sapaly dıagnostıkadan ótý jáne qajetti daǵdylardy úırený úshin basqa qalalarǵa jıi barýǵa májbúr boldy. Oǵan qosa árbir ata-ana bir aılyq kýrs úshin 100-120 myń teńge bere almaıdy. «Asyl mırasta» biz barlyq qajetti qyzmetterdi tegin ala alamyz. Eń bastysy, men ulymmen ózara durys qarym-qatynas qurýdy úırene alamyn», - deıdi analardyń biri Marııa Terenteva.
Pavlodarda «Asyl mıras» aýtızm ortalyǵy Bolat Ótemuratovtyń qorymen birlesip ashyldy. Qor baǵdarlamalarynyń biri «Aýtızm». Álem barshaǵa ortaq» jobasy. Onyń maqsaty – aýtıstik spektrdiń aýrýlary bar balalardyń ómir súrý sapasyn jaqsartý.
«Bizdiń óńir burynnan osyndaı ortalyqqa muqtaj bolǵan jáne búgin biz úshin úlken oqıǵa boldy. Ata-analar men ÚEU ókilderine kútkenderi úshin jeke alǵysymdy bildirgim keledi. Ortalyqtyń ashylýy bizdiń óńirde aýtızm terapııasyn damytýdy jańa deńgeıge kóteredi dep shyn júrekten úmittenemin», - dedi Pavlodar oblysynyń ákimi Ábilqaıyr Sqaqov.
Nur-Sultan, Almaty, Qyzylorda, Óskemen, Aqtóbe, Oral, Shymkent jáne Petropavlda ashylǵan mundaı ortalyqtar qazir oń nátıje berip jatyr.
«Bizdiń ortalyqtarymyzdyń esigi barlyq ata-analar men balalar úshin ashyq. Munda eń ozyq ádistemeler boıynsha daıyndalǵan mamandar aýtıstik spektrdiń buzylýyn tegin anyqtaıdy jáne ony beıimdeý úshin jeke baǵdarlama ázirleıdi. Bizdiń barlyq ortalyqtarymyz sabaqtardy Kalıfornııa ýnıversıteti jáne Atlantadaǵy Marcus Autism Center ázirlegen amerıkalyq ádispen ótkizedi. Bul tehnologııalar óziniń tıimdiligin dáleldedi. Bizdiń ortalyqtarǵa kelgen ár balanyń damýynda ilgerileýshilik bar», - dedi qordyń dırektory Marat Aıtmaǵambetov.
Jańa ortalyqta dıagnostıka kabıneti bar. 3 jastan 7 jasqa deıingi balalar úshin «Djasper» kabıneti jumys isteıdi, onda tárbıelenýshilerdiń bazalyq oqý jáne sóıleý qabiletteri baǵalanady. Beıimdeý kabınetinde qarym-qatynas jasaý, sóz túsiný, ózine-ózi qyzmet kórsetý jáne vızýaldy qabiletter damytylady. Qarqyndy sharalar kabınetinde balalar ata-analarymen birge eki aptalyq ózara árekettesý kýrsynan ótedi. Sondaı-aq ortalyqta 8 jastan 15 jasqa deıingi balalardy áleýmettik beıimdeý synyby, erteden qoldaý kabıneti jáne sensorlyq bólme bar. Ortalyq tárbıelenýshilerine keshendi kómekti joǵary bilikti mamandar toby, ıaǵnı defektolog, psıholog, logoped, EDSh nusqaýshysy jáne basqalar kórsetedi. Ortalyq qyzmetkerleriniń biliktiligi únemi arttyrylyp otyrady, bastysy, ata-analar balalarymen qarym-qatynas qurýdy úırenedi.