Pavlodarda aýrýhanada jatqan naýqas tórtinshi qabattan sekirip ketken
22:23, 16 Maýsym 2023
PAVLODAR. QazAqparat – Pavlodarda er adam aýrýhananyń tórtinshi qabatynan qulap, mert boldy. Naýqas aýrýhanada bir kún ǵana jatqan, dep habarlaıdy QazAqparat Pavlodarnews.kz-ke silteme jasap.
Pavlodar oblysy densaýlyq saqtaý basqarmasynyń málimetinshe, qaıǵyly jaǵdaı 28 mamyr kúni saǵat 23:50-de bolǵan. Naýqas Ǵ. Sultanov atyndaǵy oblystyq aýrýhananyń tórtinshi qabatynan sekirip, qaıtys boldy.
Oqıǵa ornyna dereý polıtsııa qyzmetkerleri shaqyryldy. Atalǵan fakti boıynsha quzyretti organdar tergeý júrgizip jatyr.
«Naýqas tynys alý joldarynyń aýrýlarymen aýrýhanaǵa 27 mamyr kúni tústi. Dárigerlerdiń aıtýynsha, ol tıisti em alyp, ózin baıypty ustady. Onyń nelikten mundaı áreketke barǵany ázirge anyqtalǵan joq», - dedi basqarmadan.
Aýrýhananyń ákimshiligi qyzmettik tergeý júrgizgen, alaıda medıtsına qyzmetkerleri tarapynan qaıǵyly jaǵdaıǵa ákep soǵýy múmkin faktiler anyqtalmaǵan.