Pavlodarda aýyldyq ambýlatorııany jańǵyrtqan merdiger jeldetkish júıesin ornatpaı ketken

<p>PAVLODAR. KAZINFORM - Áýelbek aýylynda ornalasqan ambýlatorııany jóndeýge bıýdjetten 82 mln teńge bólingen. Joba boıynsha nysanda bolattan jasalǵan aýa ótkizgishter bolýy tıis edi.</p>

Aqtoǵaı aýdanynda bolǵan kemshilik jaıynda «Ádildik joly» RQB Pavlodar oblystyq fılıalynyń jetekshisi Nurgúl Qaıyrdenova habarlady. Onyń aıtýynsha, nysan «Aýyldyq densaýlyq saqtaýdy jańǵyrtý» ulttyq jobasy aıasynda jóndelgen.

- Áýelbek aýylyndaǵy dárigerlik ambýlatorııa byltyr jańǵyrtylǵan. Onyń smetalyq-qujattamalyq jobasyn zerdelep, nysannyń ózin qaraı kelgende, myryshpen qaptalǵan bolat aýa ótkizgishterdiń joq ekenin ańǵardyq. Bul uıymda adamdarǵa medıtsınalyq qyzmetter kórsetiledi, soǵan oraı ol jerde aýa almasyp turýy kerek. Ondaı jaǵdaı jasalmasa, qyzmetkerler men kelýshiler aýa azdyǵynan qıyndyq kórýi múmkin, - deıdi N.Qaıyrdenova.

Birlestik ókiliniń sózinshe, ǵımaratty jańǵyrtýǵa bólingen 82 mln teńge az qarajat emes. Anyqtalǵan kemshilik boıynsha tapsyrys berýshi – Aqtoǵaı aýdandyq aýrýhanasyna qatysty ákimshilik hattama toltyrylyp, barlyq aqaýlardy joıý týraly uıǵarym jasalǵan.

Óńirlik densaýlyq saqtaý basqarmasyndaǵylar atalǵan nysandy kúrdeli jóndeý barysynda shyn máninde aǵyndy-tartqysh jeldetkish júıesi montajdalmaı qalǵanyn rastady. Qazirgi ýaqytta dárigerlik ambýlatorııada jeldetkish júıesin qalpyna keltirý júrgizilip jatyr.