Pavlodarda aýǵan soǵysy ardagerlerine 250 myń teńgeden beriledi

<p>PAVLODAR. KAZINFORM — Mundaı bir rettik kómek Pavlodar qalasynda turatyn 331 ardagerge tıesili. Buǵan qosa aýǵan soǵysynda jaqyndary kóz jumǵan nemese is-túzsiz joǵalyp ketken 7 otbasyna tólem qarastyrylǵan.</p>

Bıyl Aýǵanstannan keńes áskerleriniń shyǵarylǵanyna 35 jyl tolady.

Ataýly dataǵa oraı ardager jaýyngerler men ofıtserlerge jáne jaqyndaryn joǵaltqan otbasylarǵa 250 myń teńge kóleminde bir jolǵy áleýmettik kómek kórsetiledi.

— Internatsıonal jaýyngerlerge jyl saıyn bólinip kelgen 150 myń teńgelik járdemaqyǵa bıyl qosymsha 100 myń teńge qosylady. Bul — 35 jyldyq mereıtoıǵa oraı beriletin bir rettik tólemaqy, -dep habarlady Pavlodar qalasy jumyspen qamtý jáne áleýmettik baǵdarlamalar bólimi basshysynyń orynbasary Larısa Kýzmenkova.

1979-1989 jyldardaǵy aýǵan soǵysyna keńes áskeri qatarynda qazaq elinen 22 myń jaýynger qatysqan.

Qazaqstanda kózi tiri 16 myńǵa jýyq ınternatsıonal jaýynger turyp jatyr.