Pavlodarda aýdan ákiminiń uly 7 synypta oqıtyn qyzdy uryp, murnyn syndyrǵan

<p>PAVLODAR. KAZINFORM - Bul týraly zardap shekken qyzdyń anasy Instagram-daǵy paraqshasynda jarııalady. Ol prokýratýra men oblys ákiminen bul iske aralasyp, kináli tarapty qylmystyq jaýapkershilikke tartýdy surap otyr.</p>

Oqıǵa 10 qańtar kúni bolǵan. Pavlodar qalasyndaǵy №8 lıtseıdiń 6 synybynda oqıtyn er bala 7 synyptaǵy qyzdy soqqynyń astyna alyp, murnyn syndyrǵan.

Ózin Tatıana dep tanystyrǵan qyzdyń anasy bul jaǵdaıǵa prokýratýra men ózge organdar quqyqtyq turǵydan durys baǵa berýdi, uldyń ata-anasyna qatysty qabyldanǵan ákimshilik quqyq buzýshylyq týraly qaýlynyń kúshin joıýdy surap otyr.

«Meniń 7 synypta oqıtyn qyzyma 6 synypta oqıtyn er bala dene jaraqatyn salyp, murnyn syndyrǵan. Sondaı-aq ol qyzyma jeti ret aýyr soqqy jasaǵan. 16 naýryz kúni balamnyń muryn súıekteri ekinshi márte túzetildi. Prokýratýra organdarynan ákimshilik quqyq buzýshylyq týraly qaýlynyń kúshin joıyp, er balanyń ata-anasyn QR Qylmystyq kodeksiniń 140-baby boıynsha jaýapqa tartýdy suraımyn. Máselege oblys ákimi Asaıyn Baıhanovtyń da nazar aýdarýyn ótinemin», - dedi zardap shekken oqýshynyń anasy Instagram-daǵy beınejazbasynda.

Onyń sózinshe, 6 synyp oqýshysynyń anasy óńirlik kásipkerler palatasynda jumys isteıdi, ol ákimshilik jaýapkershilikke tartylǵan. Al ákesi oblystaǵy aýdandardyń birinde aýdan ákimi bolyp qyzmet etetin kórinedi. Er balaǵa ata-anasy durys tárbıe bere almaı otyr dep esepteıdi. 

Pavlodar oblysy polıtsııa departamentinen habarlaǵandaı, oqıǵa saldarynan qyz aýrýhanada jatyp shyqqan, saraptama nátıjesi keltirilgen dene jaraqatynyń jeńil dárejede ekenin anyqtaǵan. Jasóspirim zań aldynda jaýap beretin jasqa jetpegeni sebepti, onyń ata-anasyn ákimshilik jaýapkershilikke tartý týraly is materıaly sotqa joldanǵan. Zańnamaǵa sáıkes, ata-anasynyń birine 20 aılyq eseptik kórsetkish kóleminde aıyppul salý nemese 10 táýlikke deıin qamaýǵa alý týraly qaýly shyǵarylýy kerek. 

Polıtsııadaǵylar zardap shegýshi tarap materıaldyq shyǵyn óndirip alý úshin azamattyq sotqa shaǵymdana alatynyn eskertti. Al óńirlik bilim berý basqarmasy bul oqıǵany nazarda ustap otyrmyz dep sendirdi. Mektep basshylyǵy eki taraptyń da ata-analarymen kezdesken. Endigi rette ata-analar bul jaıtty quqyqtyq turǵydan sheshpekshi. Bilim berý basqarmasy óz tarapynan qyzmettik tekseris júrgizip, nátıjesine sáıkes is-sharalar qabyldaıdy.