Pavlodarda at báıgesinen Dúnıejúzilik kóshpendiler oıyndaryna irikteý ótti

<p>PAVLODAR. KAZINFORM - Pavlodarda báıgeden QR chempıonatynyń 8-kezeńi ári osy kúzde Astanada uıymdastyrylatyn 5-shi Dúnıejúzilik kóshpendiler oıyndaryna irikteý ótti. Dúbirli dodaǵa elimizdiń barlyq óńirinen 90-nan astam tulpar qatysty.</p>

QR Ulttyq sport qaýymdastyǵynyń baspasóz qyzmetiniń málimetinshe, jarys báıgeniń 4 túri boıynsha ótti: qunan báıge, top báıge, jorǵa jarys jáne alaman báıge. Jalpy júlde qory -24 900 000 teńge.

– Bul báseke - báıgeden QR chempıonatynyń 8-kezeńi, al bir jaǵynan osy kúzde Astanada ótetin 5-shi Dúnıejúzilik kóshpendiler oıyndaryna irikteý esebinde ótip jatyr. At jarysyna elimizdiń túkpir túkpirinen eń úzdik jylqylar jınaldy. Olar báıgeniń tórt túrinen, ıaǵnı qunan báıge, top báıge, alaman báıge jáne jorǵa jarys atalymy boıynsha synǵa túsedi. Ár báıge túrine shamamen 25 tulpar qatysyp jatyr. Bul attardyń jaǵdaıy jaqsy, aldaǵy úlken dodaǵa daıyn dep aıta alamyn, – dedi «Báıge» federatsııasynyń atqarýshy dırektory Altaı Bımen.

Qunan báıgeden birinshi bolyp kelgen «Qamysqulaq» atty tulpardyń shabandozy Aslanbek Abdyqal jeńis jolynda bapkerdiń keńesi kómek bolǵanyn aıtady.

– Bapkerdiń aıtýymen shaýyp otyrdym. Ol maǵan jarys bastala sala aldyńǵy topta bolýǵa keńes berdi. Sońǵy aınalymda birinshi bolyp alǵa ozdym. Márege bes júz metr qalǵanda artymnan taǵy bir at kele jatty. Jetip ala ma dep qorqyp edim, biraq men birinshi keldim. Endi kóshpendiler oıyndaryna daıyndalamyn, – dep atap ótti jas shabandoz Aslanbek Abdyqal.

II orynǵa«Naıza» atty qunan ıe boldyy, shabandozy Arnat Murathan. Júldegerler úshtigin «Aıshýaq» atty atqa mingen Ańsar Arystanbek túıindedi. 

Top báıgede «Ǵasyr» atty sáıgúlik, Álıhan Jánibekuly esimdi shabandozymen úzdik atandy. II oryndy «Ravshan» (shabandozy Dilnur Nurmuqash), ІІІ oryndy shabandoz Qaıyrjan Álıhan «Táýekel» atty tulparymen jeńip aldy.

Jorǵa jarys qorytyndysyna kelsek: I oryn – «Orda» (shabandozy ıÝrıı Lymar), II oryn – «Vypýsk» (shabandozy Ánýarbek Abdrahmanov), III oryn «Aqjaýyn» (shabandozy Erbulan Tileǵalıuly).

Alaman báıge nátıjesi boıynsha І oryndy «Soflor Lend» atty aıǵyr ıelense (shabandozy Ámir Amanuly), ІІ oryndy «Bereke» (shabandozy Irınat Sanjar), ІІІ oryndy «Shaıkúreń» (shabandozy Arnat Murathan) jeńip aldy.

Іs-sharanyń seriktesteri – QR Ultyq sport qaýymdastyǵy, Respýblıkalyq «Báıge» federatsııasy jáne Pavlodar oblystyq ákimdigi.

Eske sala keteıik, respýblıkalyq «Báıge» federatsııasy Qazaqstan Respýblıkasy Ulttyq sport qaýymdastyǵynyń quramyna kiredi. Qaýymdastyq quramynda budan ózge «Aýdaryspaq», «Kókpar», «Teńge ilý», «Sadaq atý», «Jamby atý», «Qusbegilik», «Asyq atý», «JORYQ» at sporty jáne t.b. federatsııalar bar. QR Ulttyq sport qaýymdastyǵyn belgili kásipker, metsenat, «Altyn Qyran Foundation» Qoǵamdyq qory qamqorshylyq keńesiniń tóraǵasy Islambek Saljanov basqarady.

Aıta keterligi, 8-13 qyrkúıekte Astana qalasynda 5-shi Dúnıejúzilik kóshpendiler oıyndary ótedi. Іs-sharaǵa 89 elden 2000-nan astam sportshy qatysady dep josparlanýda. Astanada ótetin Dúnıejúzilik kóshpendiler oıyndarynda barlyǵy 21 sport túrinen 97 medal jıyntyǵy sarapqa salynady.

Eske sala keteıik, Astanada ótetin V Dúnıejúzilik kóshpendiler oıyndaryna Qyrǵyzstannan 268 sportshy qatysady.