Pavlodarda armııa generaly Saǵadat Nurmaǵambetovke memorıaldyq taqta ashyldy

ASTANA. QazAqparat - Pavlodar oblysy Qorǵanys isteri jónindegi departamentiniń aýmaǵynda Keńes Odaǵynyń Batyry, Táýelsiz Qazaqstannyń birinshi Qorǵanys mınıstri, №1 Halyq qaharmany Saǵadat Nurmaǵambetovtyń 99 jyldyǵyna arnalǵan memorıaldyq taqtanyń saltanatty ashylý rásimi ótti, dep habarlaıdy QazAqparat.

QR Qorǵanys mınıstrligi baspasóz qyzmetiniń habarlaýynsha, atalmysh sharaǵa oblys ákimdiginiń ókilderi, Parlament Senatynyń depýtaty Serik Aqylbaı, Qarýly kúshterdiń ardagerleri, Pavlodar garnızony áskerı bólimderiniń áskerı qyzmetshileri, belgili qoǵam qaıratkerleri qatysty.

– Óskeleń urpaq jáne qazirgi áskerı qyzmetshiler úshin de armııa generaly Saǵadat Nurmaǵambetov – Otanyna adal, janqııarlyqpen qyzmet etken tulǵa. Keler jyly elimiz batyrdyń júz jyldyq mereıtoıyn atap ótedi. Búgingi oqıǵa da qazaqtyń qaharman ulyn ulyqtaýǵa arnalǵan mańyzdy kún bolyp otyr, – dep atap ótti Pavlodar oblysy Qorǵanys isteri jónindegi departamenti bastyǵynyń orynbasary podpolkovnık Almasbek Buharbaev.

Batyrdyń músini Keńes Odaǵynyń batyry, Halyq qaharmany armııa generaly Saǵadat Nurmaǵambetov atyndaǵy Halyqaralyq qoǵamdyq qaıyrymdylyq qorynyń bastamasymen ornatylǵanyn atap ótken jón.

Jıyn sońynda «Saǵadat» áni shyrqalyp, Pavlodar garnızonynyń áskerı qyzmetshileri saltanatty marshpen júrip ótti.