Pavlodarda antıkor kásipkerlik qyzmetti kedergisiz júzege asyratyn oryndardy belgilep berdi

<p>PAVLODAR. KAZINFORM &ndash; Óńirlik Sybaılas jemqorlyqqa qarsy qyzmettiń usynysy boıynsha kásipkerler úshin saýda nysandary ornalasatyn jerler men baǵyttar bekitildi. Budan bylaı kóshede saýda jasaǵysy kelgen jeke kásipkerler esh kedergisiz belgilengen jerlerde shatyr jaıyp otyra alady.</p>

Buǵan deıin Pavlodar qalasynda saýda-sattyq jasaýǵa arnalǵan 26 oryn qarastyrylǵan bolatyn. Alaıda olardyń naqty ornalasqan jeri men marshrýttyq syzbasy qujattarda kórsetilmegen. Saldarynan ruqsat etilmegen saýda oryndary kóbeıip ketken. Atqarýshy organdar óz qalaýlary boıynsha bıznes sýbektilerin anyqtap, olardy bızneske tıimsiz aımaqtarǵa kóshire salatyn. Mundaı jaıttar jemqorlyq táýekelderin týdyryp kelgeni ras.

Óńirlik Sybaılas jemqorlyqqa qarsy qyzmettiń baspasóz qyzmetinen habarlaǵandaı, antıkordyń usynysy boıynsha Pavlodar qalasynyń ákimdigi azyq-túlik jáne azyq-túlik emes taýarlarmen saýda jasaý quqyǵyn bere otyryp, kásipkerler úshin saýda obektileriniń ornalasqan jeri men marshrýttaryn bekitti.

«Endi jazǵy ýaqyt kezeńi bastalǵanda kásipkerler belgili bir jerlerde saýda shatyrlaryn, jármeńkelerdi, jalǵa berý pýnktterin jáne attraktsıondardy kedergisiz uıymdastyrýǵa múmkindik alady», dep málimdedi antıkor qyzmetinen.