Pavlodarda áleýmettik mańyzdy nysandardyń qurylysyna 41 mlrd teńgeden astam qarjy bólingen

<p>PAVLODAR. KAZINFORM &ndash; Pavlodarda áleýmettik saladaǵy mańyzdy nysandardyń qurylysyna 41 mlrd teńgeden astam qarjy bólingen. Bul qarajatqa jańa emdeý mekemeleri, dene shynyqtyrý-saýyqtyrý keshenderi jáne mádenıet úıleri salynady.</p>

Óńirlik qurylys basqarmasynyń habarlaýynsha, bıylǵy jazdyń sońyna taman Sharbaqty, Maı, Ertis, Aqqýly aýdandarynyń aýyldarynda jańadan 9 medıtsınalyq pýnkt jáne Ekibastuzdyń aýyldyq aımaǵynda bir feldsherlik-akýsherlik pýnkt ashylady. Bul jobalar «Aýyldyq densaýlyq saqtaýdy jańǵyrtý» ulttyq jobasynyń aıasynda júzege asyp otyr, oǵan 1,5 mlrd teńge bólingen.

Buǵan qosa Pavlodardaǵy №1 aýrýhanany rekonstrýktsııalaý jumystary jalǵasýda. Munda aldaǵy ýaqytta jeti qabatty blok pen jańadan alty ota jasaý blogy paıdalanýǵa beriledi. Emdeý mekemesine jalpy somasy 3 mlrd teńgeniń medıtsınalyq qural-jabdyqtary satyp alynǵan.

Al «Jaıly mektep» ulttyq jobasy boıynsha oblys ortalyǵynda jańadan eki mekteptiń qurylysy júrip jatsa, №34 mektepke qosymsha qurylys salynýda. Sondaı-aq bıyl aýyldarda 16 sporttyq nysan, Sharbaqty aýdanynda ulttyq at sporttaryna arnalǵan stadıon, Aqsý qalasynda muz saraıy salynyp bolýy kerek.

Eske sala keteıik, byltyr elimizdegi qurylys jumystarynyń kólemi 15,1%-ǵa ulǵaıǵan.