Pavlodarda áleýmettik kómek alý úshin tabysyn jasyrǵandar anyqtaldy

PAVLODAR. QazAqparat - Aǵymdaǵy jyldyń sáýir aıynan bastap Pavlodarda jańa formattaǵy ataýly áleýmettik kómek 3275 otbasyna tólenip, olardyń 1940-y – shartty, 1335-i shartsyz aqshalaı kómek aldy, dep habarlaıdy pavlodarnews.kz.

Jýyrda Eńbek mınıstrliginiń baspasóz qyzmeti «E-Halyq» aqparattyq júıesindegi derek boıynsha Qazaqstanda 21 myńǵa jýyq otbasy az qamtamasyz etilgen jáne muqtaj otbasylarǵa beriletin ataýly áleýmettik kómekti alý úshin ózderiniń naqty kiristerin jasyrǵanyn málim etti.

Qalalyq áleýmettik kómek bóliminiń basshysy Áıgerim Mustafınanyń aıtýynsha, búginde bólim Pavlodarda ataýly áleýmettik kómekti zańsyz alatyndardy anyqtaý boıynsha belsendi jumys júrgizýde. Tekserýdiń alǵashqy nátıjeleri de bar.

«Qazirdiń ózinde 22 otbasy jańa formataǵy ataýly áleýmettik kómek alý úshin qujat tapsyratyn kezde tabystaryn jasyrǵany anyqtaldy. Olardy jańa derekter bazasy eseptep shyǵardy. Sonymen qatar, jumysshylar barlyq úılerge baryp tekserýde. Adamdar jýyrda avtokólik, basqa da múlikti satqanyn nemese syılyqaqy alǵandyǵyn kórsetpeıdi. Ázirge, Pavlodarda tabysyn jasyrǵandardyń arasynda birde-bir kópbalaly otbasy joq», - dedi Áıgerim Mustafına.

Sáýirden bastap zańsyz alǵan AÁK-lerin otbasylar memleketke qaıtarýǵa týra keledi. Qalalyq áleýmettik kómek bólimi mamandarynyń aıtýynsha, ár otbasy úshin qarajat ártúrli. Ortasha eseppen 300-500 myń teńge.

«Eger óz erikterimen qaıtarýǵa kelispese, onda bul aqshany sot arqyly óndirip alýǵa týra keledi. Qaıta atap óteıin, belgili bolǵandaı, bul adamdar kómekke muqtaj bolmaǵan. Biraq memlekettiń kómegine muqtaj jandar da bar ǵoı», - dedi Áıgerim Mustafına.