Pavlodarda álemdegi tuńǵysh ferrosılıkoalıýmınııa zaýyty iske qosylady
Bul týraly búgin Almatyda ótip jatqan «INFACON XIII» Búkilálemdik ferroqorytýshylar kongresinde aıtyldy.
«Qazir elimizde 1 mln. 600 myń tonna qorytpa óndiriledi. Temir qorytpalaryn alý Qazaqstanda jaqsy damyǵan. Oǵan juma kúni Pavlodarda Úkimet basshysynyń qatysýymen ashylatyn jańa óndiris orny aıqyn dálel bola alady. Zaýytta dúnıejúzi boıynsha tuńǵysh ret ónerkásiptik jolmen ferrosılıkoalıýmınııa óndiriletin bolady. Bul - qazaqstandyq qorytpa ǵylymynyń zor jetistikteriniń biri», - deıdi «QR Mıneraldyq shıkizatty keshendi qaıta óńdeý jónindegi ulttyq ortalyǵy» respýblıkalyq memlekettik kásipornynyń bas dırektory, QR Memlekettik syılyǵynyń ıegeri Ábdirásil Jármenov. QR UǴA akademıgi, tehnıka ǵylymdarynyń doktory Á.Aldashulynyń aıtýynsha, jańa qorytpa jasaý álemde óte sırek kezdesetin oqıǵa. Oǵan eń sońǵy jańa qorytpanyń budan 60 jyl buryn óndirilgeni naqty dálel. Al «qazaqstandyq» degen ataýmen shyǵarylatyn bul ónimge qazirdiń ózinde álemde suranys óte joǵary bolyp tur. Qazaqstandyq ǵalymdardyń patenti boıynsha ınnovatsııalyq bul jańa qorytpa zaýyttary aldaǵy ýaqytta dúnıejúziniń túkpir-túkpirinde salynbaq. Onyń alǵashqysy 1 aıdan keıin Brazılııada ashylsa, jyl sońyna qaraı mundaı zaýyt Qyrǵyzstanda iske qosylady.