Pavlodarda Abaıǵa eskertkish ornatylady
Bul týraly óńirlik kommýnıkatsııalar qyzmetinde ótken baspasóz máslıhatynda oblystyq mádenıet, tilderdi damytý jáne arhıv isteri basqarmasynyń basshysy Ernur Dáýenov málim etti.
«Qazaqstan Respýblıkasynda ornatylatyn eskertkishter men monýmentter boıynsha Memlekettik komıssııa Abaı eskertkishiniń eskızin bekitti. Avtory - Asqar Nartov. Eskertkish ornatylatyn jer oblystaǵy ardagerler men sýretshilerdiń qatysýymen tańdaldy», - deıdi Ernur Dáýenov.
Onyń aıtýynsha, Oqýshylar saraıynyń aldynda adamdar demalatyn jaıly oryndar bar. Mundaǵy negizgi ıdeıa - oqýshylardyń sanasyna aqynnyń murasyn sińirý. Sýretshi sońǵy eskızderin bir aıdyń kóleminde usynady. Sol kezde bıiktigi týraly jáne basqa da tolyq aqparat beriledi. Qalalyq ákimdiktiń sheshimimen 2020 jyldyń bıýdjetine Abaı kóshesin abattandyrý jumystary engizilgen. Arnaıy bastamashyl top qurylyp, jeke menshik úılerdiń syrtyndaǵy oramdardy jóndeý boıynsha kelissózder júrgizetin bolady.
«Eskertkish Nur-Sultan qalasynda quıylady. Sáýletshimen kelisimshart jasalýda. Músin men tuǵyrdy quıýǵa, kóriktendirýge jabdyqtaýshy jaýap beredi», - dep atap ótti Ernur Dáýenov.
Aıta keter jaıt, bul Asqar Nartov daıyndaǵan Abaıdyń ekinshi músini. Alǵashqysy Qaraǵandy qalasyna ornatylǵan bolatyn.