Pavlodarda 9-synyp oqýshysy Oralhan Bókeı oqýlarynyń jeńimpazy atandy
Pavlodar qalalyq mádenıet jáne tilderdi damytý bóliminiń sektor meńgerýshisi Meıram Nuǵmannyń aıtýynsha, qatysýshylardyń kóbi joǵary synyp oqýshylary men joǵary oqý oryndarynyń stýdentteri. Sonymen qatar, mektep muǵalimderi, balabaqsha tárbıeshileri jáne basqa da túrli kásiporyn qyzmetkerleri bar. Qatysýshylardyń jasy 17-30 aralyǵynda.
"Oralhan Bókeı oqýlary qalalyq konkýrsy «Tilderdi qoldanýdyń 2011-2020 jyldarǵa arnalǵan memlekettik baǵdarlamasy» aıasynda jyl saıyn ótedi. Jalpy, jyl ótken saıyn sapasy artyp, qatysýshylardyń sany kóbeıip keledi. Maqsatymyz - jastar arasynda kitap oqý mádenıetin qalyptastyrý, ónerli jastardy anyqtaý, olardy halyqqa nasıhattaý jáne yntalandyrý", - deıdi Meıram Nuǵman.
Baıqaý qorytyndysy boıynsha ekinshi oryndy №35 jalpy orta bilim berý mektebiniń muǵalimi Baqytgúl Syrnaı, úshinshi oryndy №33 jalpy orta bilim berý mektebiniń 11-synyp oqýshysy Baıtursyn Jumabaı enshiledi. Sonymen qatar, InEÝ kolledjiniń 1-kýrs stýdenti Aıerke Qýanysh «Oryndaýshylyq sheberligi», B.Ahmetov atyndaǵy pedagogıkalyq kolledjdiń 2-kýrs stýdenti Láılá Kirishan «Qarymdy qabilet» atalymy boıynsha marapattaldy. Birinshi oryn ıegerine noýtbýk berilse, ekinshi jáne úshinshi oryndarǵa planshet pen uıaly telefon tartý etildi. Jeńimpaz atanǵan Marlen Orazbaı oblystyq kezeńde Pavlodar qalasynyń namysyn qorǵaıdy.