Pavlodarda 72 otbasy qonys toıyn toılady
Toǵyz qabatty úıdiń qurylysy 2018 jyly jeltoqsan aıynda bastalǵan. Merdiger uıym - «UM Engineering» JShS. Jańa úıde 72, ıaǵnı, 36 bir bólmeli, 18 eki jáne 18 úsh bólmeli páter bar. Al páterlerdiń jalpy aýdany 42 myń sharshy metrdi quraıdy.
- 28 jyl ishinde Qazaqstanda kóptegen jańa ǵımarattar, sondaı-aq shaǵyn aýdandar salyndy, - dedi páter kiltterin tabystaý kezinde oblys ákimi Bolat Baqaýov - Mine, búgin uly mereke qarsańynda, «7-20-25» baǵdarlamasy boıynsha páter alǵan baqytty otbasylardy kórip turmyn. Elbasy men Prezıdenttiń dana saıasatynyń arqasynda elimizde turǵyn úı qurylysy qarqyndy damyp keledi. Eger úsh jyl buryn biz jylyna 165 myń sharshy metr salsaq, qazir 300 myńnan astam sharshy metr salýdamyz. 2021 jyly biz Saryarqa shaǵyn aýdanyn aıaqtaımyz. Al kelesi jyldan bastap osy shaǵyn aýdandy abattandyrýmen aınalysatyn bolamyz. Jańa páterlerge 72 úmitkerdiń 20-sy turǵyn úı sertıfıkatyn alǵan. Qalǵan 52 otbasy páterdi óz qarajatyna satyp aldy. Ǵımarattaǵy 1 bólmeli páterlerdiń aýmaǵy 40-46 sharshy metrdi, 2bólmeli 62-64 sharshy metr, 3 bólmeli - 83,1-83,8 sharshy metrdi quraıdy.
Qonys toıyn toılap jatqandardyń biri – Pavlodar munaı-hımııa zaýytynyń qyzmetkeri Toqtar Ómirtaev. - Pavlodarǵa kelgenime úsh jyl boldy, - dedi Toqtar Ómirtaev . – Qarajatty osy ýaqyt aralyǵynda jınadyq. Jastar jyly men Táýelsizdik kúni qarsańynda jas otbasy retinde armandaǵan úıimizge qol jetkizip otyrmyz. Óte qýanyshtymyn. Armandardyń oryndalatynyna senemin.
Aıta keteıik, jyl basynan beri oblysta 170 myń sharshy metrge jýyq turǵyn úı paıdalanýǵa berildi, bul ótken jylmen salystyrǵanda 11 paıyzǵa artyq. 272 otbasy jańa páterge qonystandy. Jyl sońyna deıin taǵy da 1399 otbasy páter kiltterine ıe bolady.