Pavlodarda 7-synyp oqýshysy bes til meńgergen
«Daryndy bala - belgili bir qyzmette, salada óziniń jarqyn, aıqyn, keremet jetistikterimen erekshelenetin bala. Dál osyndaı bala oblystyq daryndy balalarǵa arnalǵan kópsalaly lıtseı-ınternatynda oqıdy, - dep habarlady Pavlodar oblystyq bilim basqarmasy. – Jetinshi «B» synybynyń oqýshysy Rýslan Qýanov óziniń týabitken qabilet-darynynyń arqasynda jastaıynan shet tilderin úırenýde joǵary nátıje kórsetken. Qazirgi ýaqytta Rýslan bes tildi - qazaq, aǵylshyn, qytaı, orys jáne frantsýz tilderin jetik meńgerip, jetildirýde».
Ol bes jasynda-aq aǵylshyn tilin úırene bastaǵan. Búginde kez kelgen taqyrypta erkin sóılesýge múmkindik beretin Upper-Intermediate deńgeıin ıegergen, dep atap ótti oblystyq bilim berý basqarmasy.
«Alty jasynan bastap Rýslan qytaı tilin úırenýge qyzyǵýshylyq tanytqan jáne qazir tórtinshi deńgeıge jetti. Qytaı tilin úırenýge degen qushtarlyǵynyń arqasynda Rýslan Qytaıǵa eki ret baryp kelgen. Qytaı tilin úırený qyzyq bolǵany sonsha, ol 2014 jyly alǵash ret Úrimshi qalasyna týrıst bolyp bardy, - dep atap ótti basqarma. - Al 2015 jyly ol Tsındao qalasyna til úırenýdegi mashyǵyn damytý úshin sapar shekken. Rýslan oblystyq qytaı tili olımpıadasynda eki ret joǵary nátıje kórsetken».
Tildi jaqsy bilýi Rýslanǵa Joǵary lıga quramynda olımpıadaǵa qatysýǵa múmkindik berdi. Oqýshy joǵary synyp oqýshylarymen teń dárejede ekinshi jáne úshinshi oryndardy ıelendi. Pavlodar oblystyq daryndy balalarǵa arnalǵan kópsalaly mektep-ınternat stýdentter arasyndaǵy qytaı tili olımpıadasynyń bastamashysy boldy.
«Rýslannyń daryny tek til úırenýde ǵana kórinbeıdi, ol sonymen qatar matematıka jáne hımııa sııaqty naqty ǵylymdarǵa da qyzyǵýshylyq tanytady. Bul pánderge degen qushtarlyǵy ony biraz jetistikterge jetkizgen. Tórtinshi synyptan bastap «Zerde» ǵylymı jobalar baıqaýyna qatysyp, júldeli birinshi, ekinshi oryndarǵa ıe boldy. Ol óz jumysynda shet tilderin úırenýdiń mańyzy týraly másele kóterdi jáne bul tek bastamasy ǵana» delingen habarlamada.
Keıin sol jarysta, biraq qoldanbaly matematıka baǵytynda ol «Grafıka kómegimen esepterdi sheshý» jobasymen ekinshi oryn aldy. R.Qýanov jaratylystaný-matematıka pánderi boıynsha óz bilimin kórsetti, ol besinshi-altynshy synyp oqýshylary arasynda ótken oblystyq olımpıadada birinshi jáne ekinshi oryndardy ıelengen.
«Joǵaryda atalǵan barlyq jetistikteri úshin Rýslan Qýanovtyń esimi «Bilim salasyndaǵy úzdikter» atty úlken halyqaralyq entsıklopedııaǵa engen. Bul entsıklopedııaǵa TMD barlyq aımaqtarynan kelgen oqýshylar men ustazdardyń esimderi kirgen. Redaktsııasy Máskeýde ornalasqan», - dep atap ótti bilim basqarmasy.