Pavlodarda 333 kósheniń 22 paıyzy ǵana qazaq tilinde

PAVLODAR. QazAqparat - Pavlodar qalasynda 333 kósheniń 22 paıyzy ǵana qazaq tilinde. Bul týraly óńirlik kommýnıkatsııalar qyzmetinde ótken «Tilderdi qoldaný men damytýdyń Memlekettik baǵdarlamasyn Pavlodar oblysynda júzege asyrý týraly» baspasóz máslıhatynda belgili boldy, dep habarlaıdy pavlodarnews.kz.

Oblystyq tilderdi damytý basqarmasynyń basshysy Sáýle Osmanova aıtqandaı, joǵaryda atalǵan memlekettik baǵdarlamanyń úlken bir bóligi onomastıka máselesine qatysty.

«Bul másele elimizdiń basqa óńirlerine qaraǵanda bizdiń aımaqta kúrdeli. ońtústik óńirlerde, Mańǵystaýda eldi mekender men kóshelerdiń 90 paıyzy qazaq tilinde. Tek qana Pavlodar qalasyn alsaq, 333 kósheniń 22 paıyzy qazaqsha, qalǵan 78 paıyzy orys tilinde bolyp tur»,- dep atap ótti Sáýle Osmanova.

Sáýle Osmanovanyń aıtýynsha, bul baǵyttaǵy jumys júrgizilip jatyr. Byltyr oblys boıynsha 189 kóshe qaıta ataldy. Bıyl 70 kóshe men eki aýdannyń ataýy qazaqshaǵa ózgertilgen. Lebıaji aýdany - Aqqýly, Kachır aýdany Tereńkól dep ataldy. «Onymen birge, qalamyzda 99 jyl boıy «Lenın» bolyp atalyp kelgen kósheni Astana dep qaıta atadyq. Onyń ózi úlken jetistik dep oılaımyn. Jýyrda taǵy eki kósheniń atyn ózgertý týraly máseleni oblystyq máslıhat depýtattarynyń qaraýyna usynamyz».